Steve Dillon látinn

Teiknarinn Steve Dillon sem er aðdáendum myndasagna vel kunnur er látinn. Hann var aðeins 54 ára að aldri.

Dillon er líklegast þekktastur fyrir að hafa teiknað myndasögurnar um Preacher sem nýlega hafa verið gerðar að samnefndri sjónvarpsþáttaseríu. Dillon teiknaði einnig myndasögurnar um Hellblazer sem fjalla um galdramanninn John Constantine sem leikarinn Keanu Reeves lék í kvikmynd.

Tilkynnt var um andlát Steve á Twitter en það var bróðir hans sem staðfesti fregnirnar að lokum með tísti. Dillon lést í New York þar sem hann hafði búið og starfað í rúma tvo áratugi. Ekki er vitað hvert banamein hans var.

Einn af þeim bestu

Steve Dillon var breskur, fæddur og uppalinn í Luton. Hann skaust fyrst inn á sjónarsviðið með myndasöguseríunni 2000 A.D. Eftir það hóf hann fljótlega samstarf við írska höfundinn Garth Ennis en saman sköpuðu þeir persónurnar fyrir Preacher sem er af mörgum talin vera ein besta myndasögusería allra tíma.

Preacher myndasöguseríunni lauk árið 2000 og var alltaf búist við því að verkið yrði kvikmyndað. Rétturinn á sögunni flakkaði á milli kvikmyndavera í mörg ár áður en gamanleikarinn Seth Rogan fékk það í hendur og ákvað að betra væri að gera sjónvarpsþáttaseríu úr sögunni þar sem hún er löng og viðamikil.

Sagan fjallar um prestinn Jessie Custer sem verður andsetinn af afkvæmi djöfuls og engils. Hann fær krafta sem gera honum kleift að skipa hverjum sem er að gera hvað sem er. Hann missir trúna á guð almáttugan sem hefur yfirgefið sæti sitt á himnum og ákveður að leita hann uppi og nota krafta sína til þess að láta hann svara til saka. Með honum í för eru írska vampíran Cassidy og hin byssuglaða Tulip sem er fyrrum ástkona prestsins.

Fyrsta sjónvarpsserían af Preacher kom út á þessu ári og skartar þeim Dominic Cooper, Joseph Gilgun og Ruth Negga. Serían fór vel af stað í áhorfi og nú standa yfir tökur á annarri seríu.

Hér fyrir neðan má sjá stiklu úr sjónvarpsþáttunum vinsælu.