Forsetinn virðir hefð um að vera verndari Skátahreyfingarinnar

Guðni Th. Jóhannesson sem tók við embætti forseta Íslands hinn 1. ágúst er smátt og smátt að komast inn í hefðir sem fylgja embættinu.

Í dag afhenti hann tuttugu og sjö skátum sem náð hafa átján ára aldri og haldið dagbók um starf sitt í tvö ár, skátamerkið við hátíðlega athöfn á Bessastöðum. En merkið var fyrst veitt af þáverandi forseta Íslands, Ásgeiri Ásgeirssyni, á Bessastöðum árið 1965.

Forseti Íslands er verndari skátahreyfingarinnar og því sæmdi Bragi Björnsson skátahöfðingi forsetann gullmerki hreyfingarinnar við athöfnina í dag.