Sigmundur Davíð segist hafa orðið fyrir tilefnislausri og ótrúlegri árás

„Ég hygg að enginn íslenskur stjórnmálamaður hafi farið í gegnum viðlíka skoðun á einkahögum sínum eins og ég og reyndar fjölskylda mín höfum gert síðustu misseri.“ Þetta sagði Sigmundur Davíð Gunnlaugsson, formaður Framsóknarflokksins, við upphaf kappræðna í kosningasjónvarpi RÚV í kvöld þar sem Wintris-málið bar á góma. Hann segist hafa orðið fyrir tilefnislausri og ótrúlegri árás.

Þáttastjórnendurinir Sigríður Hagalín Björnsdóttir og Heiðar Örn Sigurfinnsson spurðu hann hvort hann hygðist biðjast afsökunar á Wintris-málinu.

Sigmundur Davíð sagði að hann og fjölskylda sín hafi alltaf staðið við allt sitt gagnvart samfélaginu og aldrei gert neina tilraun til annars. Þá sagðist hann sem stjórnmálamaður ávallt hafa tekið almannahagsmuni fram yfir eigin hagsmuni.

„Ég get beðist afsökunar á ýmsu sem einstaklingur og sem stjórnmálamaður. Og sem stjórnmálamaður verður maður alltaf að reyna að bæta sig og viðurkenna það að það sé alltaf hægt að bæta sig. En það er ekki hægt að biðjast afsökunar á því sem er ekki hægt að kalla annað en ótrúlega árás sem – kom á daginn og hefur sýnt sig og verið sannað – að var tilefnislaus og ótrúlega gróf. Það breytir ekki því að ég sem stjórnmálamaður, líkt og allir aðrir stjórnmálamenn, verða stöðugt að velta fyrir sér hvað þeir geti gert betur. Og ég hef svo sannalega gert hluti sem ég hefði viljað gera öðruvísi í þessu máli og öðrum málum,“ sagði Sigmundur og bætti við að hann vildi sem stjórnmálamaður ekki bara bæta samfélagið heldur líka bæta sjálfan sig.

Þáttastjórnendur spurðu fyrrverandi forsætisráðherra þá hvort honum þætti ekkert siðferðislega athugavert við það að forsætisráðherra ætti eignir á aflandseyjum.

„Ég hef aldrei átt aflandsfélag.“

Þú áttir eignir með eiginkonu þinni þangað til að þú seldir henni hlut á einn dollar daginn áður en ný lög tóku gildi.

„Ég hef aldrei átt hlut í þessum eignum, eins og hefur reyndar verið útskýrt, mjög ítarlega og mjög vel af hálfu þeirra sem hafa farið yfir þessa reikninga alla. En það er hins vegar tilfellið að eiginkona mín átti eignir sem voru skráðar í ákveðnu landi sem hafa aldrei verið í skattaskjóli. Þetta er land sem er með tvísköttunarsamning við Ísland, upplýsingaskiptasamning við Ísland og jafnvel þó að svo hefði ekki verið þá hefði það ekki skipt máli þar sem hún hefur alla tíð gefið allt upp. Hverja einustu eign, nafn félagsins og heiti landsins á skattaskýrslu sinni,“ sagði Sigmundur Davíð.

Eftir allt þetta sem að undan er gengið, alla atburðarásina sem við lýstum hérna áðan, atburði sumarsins, þú sérð enga ástæðu til að biðjast afsökunar á Wintris-málinu.

„Jú ég nefndi það, ég get beðist aföskunar á mörgum hlutum, en ég get ekki beðist afsökunar á því með hvaða hætti ákveðnir aðilar, meðal annars á vegum ykkar stofnunar [RÚV], gengu fram í þessu máli.

Er vandamálið þá frekar hvernig flett var ofan af málinu, frekar en gjörningurinn sjálfur, í þínum huga?

„Berum saman umfjöllun um mig og mín mál, eða réttara sagt mál konu minnar og fjölskyldu, og umfjöllun um mál forsætisráðherra Bretlands, sem var sýnt fram á að hafði raunverulega notið hags af því að vera með eignir í eiginlegu skattaskjóli,“ sagði Sigmundur og útskýrði að í sínu tilviki hafi í engu reynt að fela nokkurn hlut, reynt að stinga einhverju undan, að komast hjá því að greiða, að öllu leyti, til íslensks samfélag. Þvert á móti hafi hann gengið eins langt og hann mögulega gat í að gæta almannahagsmuna, jafnvel þó að það kostaði sig eða fjölskylduna sína einhverja peninga.