Vill eignarnám og skoða lengingu út í Skerjafjörð

Formaður fjárlaganefndar Alþingis vill að flugvallarlandið í Skerjafirði, sem ríkið seldi borginni á dögunum, verði tekið til baka með eignarnámi. Þetta kom fram í viðtali við Vigdísi Hauksdóttur í fréttum Stöðvar 2. 

Sala landsins var tekin fyrir á fundi fjárlaganefndar Alþingis í morgun en fyrir tveimur árum taldi nefndin sig hafa girt fyrir afsal landsins. Bjarni Benediktsson fjármálaráðherra taldi sig hins vegar skuldbundinn að standa við samkomulag sem forveri hans, Katrín Júlíusdóttir, gerði við Dag B. Eggertsson skömmu fyrir síðustu þingkosningar. 

„Það er mjög sorglegt að þessi ríkisstjórn þurfi að uppfylla eitthvert Samfylkingarsamkomulag frá 2013. Mjög einkennilegt,“ segir Vigdís.

Meirihluti fjárlaganefndar beitti sér fyrir að heimildargrein um afsal flugvallarlandsins yrði fjarlægð úr fjárlagafrumvarpinu og taldi sig þar með hafa komið í veg fyrir sölu þess. Nú komi fjármálaráðuneytið með aðra túlkun eftirá, segir Vigdís. 

„En þá spyr ég: Afhverju var verið að óska eftir heimildinni aftur inn í fjárlög 2014? Því þá var ekki búið að ganga frá neinu.“ 

Vigdísi finnst endurgjaldið lágt fyrir svæðið. 

„Bara 440 milljónir. Svona miðað við það sem búið er að ræða um. Ég bara lít svo á að nú er kominn verðmiði á þetta land og ég held að það væri langfarsælast fyrir alla aðila að ríkið myndi ganga þarna inn og taka landið eignarnámi,“ segir formaður fjárlaganefndar.

Reykjavíkurborg hefur þegar kynnt hugmyndir að nýju 800 íbúða hverfi á umræddu svæði. Þar er miðað við að rísi þétt byggð fjögurra hæða fjölbýlishúsa. 

„Þá er náttúrlega bara neyðarbrautin farin. Það er stefna Samfylkingarinnar, Bjartrar framtíðar, Vinstri grænna og Pírata í borgarstjórn að flugbrautin hverfi.“ 

Vigdís telur enn hægt að bjarga brautinni. Í því sambandi má vísa til hugmynda sem Ómar Ragnarsson hefur kynnt sem málamiðlun í flugvallarmálinu.

„Ég hef séð teikningar þar sem lagt er til að hún fari í sjó fram, - að flugvöllurinn og þessi braut verði færð út í Skerjafjörð. Það er ofsalega fín hugmynd en það er örugglega kostnaðarsamt.“