Einn frambjóðandi hefur skilað uppgjöri

Guðrún Margrét Pálsdóttir hefur ein forsetaframbjóðenda skilað inn uppgjöri til ríkisendurskoðunar um forsetaframboð sitt samkvæmt upplýsingum frá stofnuninni. Guðrún segir framboð sitt hafa kostað 536 þúsund krónur. Henni hafi verið gefnir bæklingar að verðmæti 150 þúsund króna en afgangurinn hafi verið fjármagnaður úr eigin vasa.

Hinir frambjóðendurnir hafa þó enn tíma til að skila inn uppgjöri eða fram til 25. september en þá verða þrír mánuðir liðnir frá kjördegi. Ef kostnaður framboðs var undir 400 þúsund krónum dugar að senda yfirlýsingu þess efnis. Sé kostnaðurinn meiri þarf að skila inn uppgjöri um framboðið með upplýsingum um kostnað og fjármögnun framboðsins. Upplýsa þarf um alla lögaðila sem styrktu framboðið  auk einstaklinga sem styrktu framboðið um meira en 200 þúsund krónur. Lögaðilar og einstaklingar mega að hámarki styrkja framboð um 400 þúsund krónur. Heildarkostnaður við framboðin mátti ekki fara yfir 38 milljónir króna.

Sturla Jónsson og Hildur Þórðardóttir segja bæði að framboð sitt hafi kostað undir 400 þúsund krónum. Ekki liggur fyrir endanlegur kostnaður við framboð Guðna Th. Jóhannessonar, forseta Íslands, að sögn Þorgerðar Önnu Arnardóttur, formanns félagsins sem hélt utan um framboð Guðna. „Nei, það er enn í vinnslu, það eru enn að koma síðustu reikningar," segir Þorgerður. Guðni sagði sjálfur í kosningasjónvarpi RÚV að kostnaður við framboðið væri vel á annan tug milljóna króna. Andri Snær Magnason, segir að á næstu vikum verði farið yfir hver endanlegur kostnaður var við framboðið. „Mitt fólk er rétt að detta úr sumarfríi,“ segir Andri.

Þá segist Elísabet Jökulsdóttir ekki hafa tekið saman kostnað við framboð sitt en myndi örugglega skila inn uppgjöri degi áður en fresturinn rynni út. Davíð Oddsson áætlaði í kosningasjónvarpi RÚV að framboð hans kostaði 6-7 milljónir þótt sú tala gæti hækkað. Ekki náðist í talsmenn framboðs Davíðs, Höllu Tómasdóttur eða Ástþórs Magnússonar. 

Þessi frétt birtist upphaflega í Fréttablaðinu