Sex ára gömul stúlka einn helsti aðdáandi Boga: Sniðugur og mögulega skemmtilegur leikfélagi

Það var líf og fjör í sex ára afmæli Karitas Lóu Þórðardóttur um helgina enda var þema veislunnar ekki af verri endanum; sjálfur Bogi Ágústsson fréttaþulur RÚV. Karitas Lóa er nefnilega mikill aðdáandi Boga og hafði beðið um Boga-afmælisköku og þá fékk hún forkunnarfagurt regn-Boga-afmæliskort.

Þórður Hermannsson faðir Karitas Lóu segir að áhugi dóttur hans og Evu Kamillu Einarsdóttur á Boga hafi kviknað fyrir um það bil ári síðan.

„Hún fór alltaf að límast meir og meir yfir fréttunum og sérstaklega þegar Bogi kom. Svo fórum við að spyrja hana út í þetta af hverju hún væri svona hrifin af honum og þá fer hún að tala við okkur um að hún sé skotin í honum, en fyrir hana þýðir það að vera skotin í einhverjum bara að henni finnist hann sniðugur og mögulega skemmtilegur leikfélagi,“ segir Þórður.

Kom foreldrunum smá á óvart

Hann segir að Karitas Lóa muni alltaf eftir Boga ef kveikt er á sjónvarpsfréttunum heima og bíði spennt eftir að sjá hvort hann komi á skjáinn.

Aðspurður segir Þórður það vissulega hafa komið foreldrunum á óvart að Bogi væri átrúnaðargoð dótturinnar.

„Já, það kom okkur smá á óvart að það sé ekki einhver teiknimyndakarakter eða einhver yngri.“

Þórður segir að Karitas Lóa hafi aldrei hitt Boga þó að fréttaþulurinn hafi átt barnabarn á sama leikskóla og Karitas Lóa er á.

Að sögn Þórðar er Karitas Lóa ófeimin en segir að hún yrði kannski aðeins feimnari ef hún myndi hitta Boga sjálfan.

„Hún yrði örugglega smá feimin fyrst því hann er svo rosalega mikið „idol,““ segir Þórður.

Gaman þegar ungir krakkar fylgjast með fréttum

Bogi Ágústsson segist hafa frétt af þessum unga aðdáanda sínum í gær í gegnum móðurafa Karitas Lóu, Einar Kárason, rithöfund.

„Það er voðalega gaman að þessu og gaman að því þegar ungir krakkar fylgjast með fréttum og öðru slíku. Svo er auðvitað mjög gaman að þessi unga stelpa var á leikskóla með sonarsyni mínum sem heitir Bogi Ágústsson,“ segir Bogi í samtali við Vísi.

Hann kveðst ekki hafa vitað til þess að áður hafi verið haldið afmæli með Boga-þema þó að þetta sé alveg örugglega hvorki fyrsti né síðasti aðdáandi fréttaþularins góðkunna. En hefur Bogi ekkert velt því fyrir sér að stofna aðdáendaklúbb?

„Nei, þessi störf okkar eru nú ekki þannig að það sé mikið um persónudýrkun og mér hefur nú oft fundist svona tilraunir á Íslandi til að búa til einhvern svona „celeb-kúltúr“ hálf fíflalegar því þetta er svo lítið samfélag. Þú labbar niður í Kringlu eða niðri í bæ og þú hittir alltaf einhvern sem er svona innan gæsalappa landsfrægur,“ segir Bogi.