Legg sálina í verkið

Það er í Ingunnarstofu á Sólheimum sem Jón Geir Ágústsson og dætur hans, Þórdís og María, opna sýninguna Pensill, nál og hnífur á föstudaginn klukkan 15. Jón er þar með útskurð, Þórdís rósapúða sem hún saumar af fingrum fram og María með málverk, „smáævintýri á striga“, eins og hún orðar það sjálf.

Jón og Þórdís búa á Akureyri en María á Ítalíu. Hún er samt stödd heima eins og er.

Jón svarar símanum. „Ég er norðan heiða enn þá, en fer nú að snúa nefinu í suður. Við þurfum að fara að setja upp sýninguna,“ segir hann glettinn. Hann kveðst hafa einbeitt sér að smágerðum verkum síðustu ár, sumir útlendingar kalli þau íkon, hann kalli þau Innsta kjarna.



„Ég klýf sex til sjö sentimetra langa trjágrein við innsta kjarna og annan helminginn svo aftur. Þannig bý ég til þrennu sem ég sker út í og tengi saman. Legg sálina í verkið ef ég má vera svo hátíðlegur. Þessa muni er gott fyrir fólk að hafa fyrir framan sig eða í lófanum ef það þarf að vera í einrúmi og láta hugann reika inn að innsta kjarna,“ útskýrir hann.

 



Jón er fæddur 1935. Hann var í stórum verkefnum lengst af ævinni sem tengdust húsbyggingum. „Ég var eiginlega alinn upp á trésmíðaverkstæði föður míns og hef alltaf þurft að hafa eitthvað milli handanna, blýant og pappír eða spýtu og hníf og eignaðist góð útskurðarjárn um 15 ára aldurinn.“

 

Meðal sýningargripa á Sólheimum verður Valþjófsstaðahurðin, gerð af Jóni, helmingi minni en sú upprunalega. Einnig krossar úr sama efni og Auðunarstofa og dómkirkjan á Hólum.



„Ég hef fiktað við að vinna úr margs konar efni, til dæmis hvaltönnum, sem maður þorir varla að nefna, hvað þá sýna. Það eru svo margir búnir að gleyma því að hvalreki varð oft til bjargar Íslendingum áður fyrr.“