Kölluð „arabatussa“ og „múslimadjöfull“

Sema Erla Serdar, formaður framkvæmdarstjórnar Samfylkingarinnar og formaður flokksins í Kópavogi, deildi aftur skjámyndum af persónuárásum á sig á Facebook vegg sínum í dag. Þetta hefur hún gert áður en í janúar birti hún fjölda skjámynda þar sem hún var meðal annars kölluð tæfa, bullukollur og barnaleg.

Í þetta skiptið innihalda allar færslunnar, sem eru yfir 20 talsins, einhvers konar tilvísun í múslima. Sjálf er Sema ættuð frá Tyrklandi en hefur sagt í fjölmiðlum að hún sé trúlaus.

Þar má meðal annars lesa kvót á borð við; „Vona að Sema Erla Serðir farist í næstu hryðjuverkaárás skítmenna af hennar tagi(múslimaskítmenna)“ og einkaskilaboð þar sem hún er kölluð „arabatussa“. Einnig er hún kölluð „drusla“, múslima djöfull“, „Samfylkingar hóra“ og „nasisti“ Sema gerir engar ráðstafanir til þess að hylja myndir eða nöfn þeirra sem skjámyndirnar eru teknar af.

Vör við vaxandi hatursorðræðu á samfélagsmiðlum

Margrét Friðriksdóttir er á meðal þeirra sem á skjámynd sem Sema birtir myndir af. Þar spyr hún hvort Sema sé ekki örugglega klædd því sem hún kallar „sharía klæðnaði“ og birtir með myndir af konum í búrkum sem er klæðnaður sem hylur líkama og andlit kvenna. Margir halda því fram í færslum sínum að Sema sé múslimi og það sé sama hverju öðru hún haldi fram.

Í færslu sem fylgir birtingu skjámyndanna segist hún hafa orðið vör við vaxandi hatursorðræðu í pólitískri og samfélagslegri umræðu og það sé henni áhyggjuefni

„Hatursorðræða er merkilegt fyrirbæri sem er til staðar í öllum samfélögum,“ skrifar Sema á Facebook síðu sína. „Það sem einkennir hatursorðræðu er að gerandinn sendir þolanda meiðandi skilaboð með vísan í stöðu beggja í samfélaginu og því hefur hún áhrif á og grefur undan rétti annarra til jafnréttis og þess að þurfa ekki að þola mismunun. Sé hatursorðræða látin óáreitt getur hún haft alvarlegar afleiðingar.“

Vonaði að persónuníðið myndi hætta við birtingarnar

Hún segist hafa ákveðið að birta skjámyndirnar þar sem það hryggi hana að sjá hvernig umræðan í samfélagsmiðlum sé oft á tíðum. Einnig vonast hún til að gerendurnir sjái af sér og skammist sín. Hún segist vonast til að gerendurnir myndu biðjast afsökunar þegar þau þyrftu að svara fyrir ummæli sín á stærri vettvangi en í kommentakerfum, einkaskilaboðum eða í lokuðum hópum á Facebook.

„Á þessum síðustu mánuðum hef ég haldið áfram að safna saman og birta persónuníð í minn garð með von um að það myndi hægjast á því. Ég hugsaði með mér að ef ég myndi halda áfram að birta ummæli sem um mig eru látin falla, skilaboðin sem eru send til mín og upptökur af símtölum myndu einhverjir hætta. Það var bjartsýni. Á síðustu mánuðum hefur hatursorðræðan í minn garð versnað svo um munar.“

Hin gullna regla samskipta á netinu

Sema segir varla líða sá dagur sem hún verði ekki vör við einhvers konar hatursorð í sinn garð á samfélagsmiðlum.

Að lokum bendir hún fólki á "gullnu reglu" samskipta á netinu sem er að skrifa ekkert sem viðkomandi er svo ekki reiðubúinn til þess að segja sjálfur í andlitið á viðkomandi.



Færsluna í heild sinni má sjá hér fyrir neðan og má fletta skjámyndunum öllum þar.