Erdogan krefst þess að bandarísk stjórnvöld handtaki Fethullah Gulen

Recep Tayyip Erdogan forseti Tyrklands krefst þess að bandarísk stjórnvöld handtaki klerkinn Fethullah Gulen sem grunaður er um að hafa stýrt aðgerðum í valdaránstilrauninni í gær. Þetta sagði forsetinn þegar hann ávarpaði almenning í kvöld. Erdogan óskar þess að bandarísk stjórnvöld sendi Gulen til Tyrklands svo rétta megi yfir honum þar.

Gulen, sem býr í útlegð í Pennsylvaníufylki Bandaríkjanna, hefur neitað aðild að tilrauninni og segist fordæma hana.

Hópur tyrkja í Bandaríkjunum safnaðist saman fyrir utan heimili Gulens í Pennsylvaníu í dag til þess að mótmæla.