Mikil mildi að ekki hafi orðið slys á fólk

Slökkvilið Akureyrar var kallað að íbúð í bænum á þriðjudagskvöld vegna sprengingar á gaskút sem var við gasgrill á palli utandyra. Gaskúturinn þaut inn um glerhurð og á vegg íbúðarinnar af svo miklu afli að kvarnaðist úr honum.

„Þegar við komum á staðinn voru íbúarnir flúnir úr húsinu með þrjú börn sín,“ segir Ólafur Stefánsson slökkviliðsstjóri á Akureyri. Hann segir mikla mildi að ekki hafi orðið alvarleg slys á fólki.

„Heimilisfaðirinn var með ársgamalt barn sitt á trampólíni á pallinum þegar sprengingin varð, þá var annað heimilisfólk í skjóli í íbúðinni. Ef kúturinn hefði sprungið í aðra átt, þá hefði getað farið mjög illa,“ segir Ólafur.

„Íbúðin var undirlögð glerbrotum. Við fórum til að tryggja vettvanginn og skoða aðstæður. Tókum myndir og skrifuðum okkar skýrslur. Á gaskútnum sjálfum, sem var úr trefjaplasti, var um það bil 10-15 cm rifa,“ segir Ólafur.

Mannvirkjastofnun tekur við skýrslum slökkviliðsmanna og Vinnueftirlitið rannsakar kútinn. Lögregla rannsakaði líka vettvang sprengingarinnar. 

„Heimilisfólk hafði nýverið keypt sér tvo kúta. Þau voru búin að nota þann sem sprakk einu sinni. Hinn stóð innsiglaður. Kúturinn var ekki í notkun þegar hann sprakk. Hann stóð í sól og var í skjóli fyrir norðanáttinni, hugsanlega hitnaði hann. En það er ekki vitað og er nokkuð sem þarf að rannsaka,“ segir Ólafur.

Gaskútarnir voru keyptir hjá Olís og eru frá Kosan Gas í Danmörku. Kjartan S. Guðjónsson, sölufulltrúi hjá Olís, segir Kosan Gas sé með einna mest prófuðu vöru á markaðnum. Gasflöskurnar séu prófaðar í allskonar veðráttu frá -40 C og upp í +65 C.

Kosan og Olís muni vinna með rannsóknaraðilum málsins til að komast að því hvað hefur valdið þessu óhappi. 

„Það er ekki gott að segja hver ástæðan er, það er best að bíða niðurstöðu rannsóknar. En það sem við vitum er að þetta tengist kútnum sjálfum en ekki tengingunni,“ segir Kjartan og tekur fram að þetta sé eina tilfellið sem hann viti um. 

Þessi frétt birtist upphaflega í Fréttablaðinu