Stjórnarformaður Strætó vonsvikinn með niðurstöðuna

Bryndís Haraldsdóttir, stjórnarformaður Strætó BS, segist vonsvikin yfir niðurstöðu Héraðsdóms Reykjavíkur frá því í síðustu viku þegar Strætó var gert að greiða fyrirtækinu Iceland Excursions Allrahanda hundrað milljónir króna fyrir að fara ekki eftir eigin útboðsskilmálum. Hún hafnar fullyrðingum Þóris Garðarssonar, stjórnarformanns Allrahands, um að um spilling hafi verið að ræða.

„Við erum vonsvikin yfir því að málið hafi farið með þessum hætti. Þetta er auðvitað mál sem er orðið mjög gamalt og er langt fyrir mína tíð og okkar sem sitjum í stjórninni, þetta útboð var árið 2010. En það er búið að vera lengi í gangi og við höfum að sjálfsögðu haldið uppi vörnum fyrir Strætó BS. En þetta er allavega niðurstaðan í héraði, svo eigum við eftir að fara betur yfir þetta með lögfræðingi okkar á stjórnarfundi á föstudag og ákveða þá í framhaldi af því hver verða okkar viðbrögð,” segir Bryndís.

Iceland Excursions Allrahanda stefndi Strætó vegna lokaðs útboðs árið 2010. Strætó hafði boðið út akstur á þrettán leiðum almenningsvagna á höfuðborgarsvæðinu, Allrahanda sendi inn tilboð en fyrirtækið Hagvagnar fékk hins vegar verkefnið þrátt fyrir að vagnar fyrirtækisins hafi ekki uppfyllt skilyrði útboðsins.

Bryndís segir að allar ákvarðanir í innkaupaferlinu hafi verið teknar í samráði við sérfróðan umsjónaraðila útboðsins.

„Ég var ekki stjórnarformaður á þessum tíma og sat ekki í stjórninni en við höfum alltaf notið ráðgjafar hjá innkaupadeild Reykjavíkurborgar. Í þessu máli og fleiri málum þegar við erum í útboðum þá erum við líka með VSÓ ráðgjöf með okkur þannig að við höfum bæði verið með lögfræðinga og sérfræðinga sem hafa stýrt þessu fyrir hönd samlagsins og stjórnin í á endanum tekið formlegar ákvarðanir að ráðleggingum þessara aðila.”

Þórir Garðarsson stjórnarformaður Allrahanda var harðorður í kvöldfréttum Stöðvar 2 í gær og sagði það alvarlegt mál ef byggðasamlög á borð við Strætó fylgi ekki viðurkenndum samkeppnissjónarmiðum. Þá sagði hann dóminn endurspegla spillingu í stjórn samlagsins.

„Ég held að þetta sé alveg úr lausu lofti gripið. Ég bara trúi því og treysti að kjörnir fulltrúar og sveitarstjórnarmenn hérna á höfuðborgarsvæðinu sem sátu í stjórn á sínum tíma hafi gert allt til að tryggja hagsmuni Strætó á sínum tíma. Ljóst er að þarna var um lægsta útboðið að ræða og það er yfirleitt hefð fyrir því, og meira að segja lögin gera ráð fyrir því, að lægsta tilboði skuli tekið. Þannig að ég hef engar upplýsingar um og efast mjög um að um einhverja spillingu sé að ræða í þessu máli,” segir Bryndís.

Þá vill hún ekki segja af eða á hvort málinu verði áfrýjað. Slík ákvörðun verði tekin á fundi stjórnarinnar á föstudag.