Lax kominn óvenju snemma í Elliðaárnar

Fyrsti lax sumarsins úr Elliðaánum – glæsilegur hængur – reyndist örmerktur. Óvenju margir laxar hafa þegar gengið í árnar miðað við það sem er alla jafna í ánum.

Jóhannes Sturlaugsson, sérfræðingur hjá fyrirtækinu Laxfiskum ehf., annast árlegar örmerkingar í Elliðaánum á náttúrulegum gönguseiðum, sem er mikilvægur þáttur í árlegri vöktun sem fyrirtæki hans annast fyrir Stangaveiðifélag Reykjavíkur (SVFR). Þegar vakin var athygli á því að laxinn væri veiðiuggalaus til merkis um að hann bæri örmerki í snoppunni fór Jóhannes á stúfana og fann örmerkið, sem reyndar er aðeins einn millimetri að stærð.

Jóhannesi segist svo frá í færslu á Facebook-síðu sinni: „Þegar ég fann loks 1 mm langa örmerkjaflísina þá gat ég lesið merkið í víðsjá svo sem venjan er, og grafið upp hvenær og hve stór fiskurinn var þegar hann lagði upp í sjóferð sína sem gönguseiði. Niðurstaðan var sú að þessi myndarhængur sem Karólína Inga Guðlaugsdóttir, annar Reykvíkingur ársins 2016, veiddi í morgun [mánudagsmorgun] hóf sjóferð sína 6. júní 2014 eða þar um bil, þá 11,8 sentimetrar að lengd. Þann dag örmerkti ég laxinn góða ásamt öðrum gönguseiðum sem þá voru einnig á leið til sjávar,“ skrifar Jóhannes.

Hængurinn væni reyndist vera 87 sentimetra langur og bendir Jóhannes á að hann hafði því lengst um 75 sentimetra á þeim tveimur árum sem sjóferð hans stóð, og auðvitað margfaldað þyngd sína. „Því má ljóst vera að honum hefur gengið vel að rífa í sig á ætisslóðum Norður-Atlantshafsins,“ bætir Jóhannes við en fenginn má skoða í því ljósi að frekar fáir stórlaxar veiðast í Elliðaánum ár hvert. Vísar þetta til frábærrar veiði sem hefur verið við opnanir margra af helstu laxveiðiám landsins í sumarbyrjun. Met hafa fallið og víðast hvar er mikið að sjá og lax búinn að dreifa sér langt upp eftir vatnakerfunum.

Þetta er í ekkert öðruvísi í Elliðaánum og Jóhannes segir frá því að óvenju margir laxar séu á ferðinni svo snemmsumars.

„Þetta sést vel á því að fyrsta eina og hálfa sólarhringinn sem fiskteljarinn við Rafstöðina hefur verið opinn fyrir umferð þá hafa 55 laxar farið upp um hann á leið sinni upp Elliðaárnar,“ skrifar Jóhannes en þeir voru orðnir 63 um hádegi í gær.

Þess má geta að alls veiddist 21 lax á fyrsta degi veiða í Elliðaánum.

Fréttin birtist fyrst í Fréttablaðinu 22. júní 2016