Mikill áhugi á lækningajurtum

Anna Rósa grasalæknir leiðir grasagöngu í Viðey á morgun, sunnudag, klukkan 13.30. Hún segir mikinn áhuga vera til staðar á íslenskum lækningajurtum og Viðey henti vel til að læra að þekkja algengustu jurtirnar.



„Ég býst við þó nokkrum fjölda. Svona göngur hafa verið haldnar undanfarin ár og alltaf verið vel sóttar. Gangan er í boði Reykjavíkurborgar og kostar ekki neitt,“ segir Anna Rósa grasalæknir en hún fræðir áhugasama um íslenskar lækningajurtir í Viðey á morgun.

„Við göngum í sjálfu sér ekki langt, um leið og komið er úr bátnum er að finna fjölda lækningajurta á bakkanum. Við munum halda okkur á stígunum en meðfram þeim öllum er að finna í það minnsta fimmtán tegundir lækningajurta,“ útskýrir Anna Rósa og segir Viðey heppilegan stað til þess að læra að þekkja algengustu jurtirnar.

Aðferðir og virkni



„Viðey er í sjálfu sér ekki stórt svæði ef fólk ætlar sér að tína mikið af jurtum, það eru aðrir staðir hentugri til þess. En Viðey er frábær staður til þess að læra að þekkja þessar algengustu. Ég verð með áhöldin mín með mér og sýni fólki hvernig á að bera sig að við að tína jurtirnar og hvernig á að þurrka þær. Þá fer ég yfir virkni jurtanna og hvernig má nýta þær, til dæmis í te, tinktúrur og olíur og í matargerð. Ég vil að fólk geti haft sem mest gagn af þessu, farið heim eftir ferðina og eldað úr því sem tínt er, til dæmis arfa og túnfíflum.“

Kenndi fátækum í Hondúras



Anna Rósa tínir þó ekki einungis íslenskar lækningajurtir. Í byrjun árs dvaldi hún í Hondúras þar sem hún bæði miðlaði af sinni þekkingu á jurtum og lærði sjálf.

„Ég var þarna í fimm vikur í sjálfboðavinnu með samtökum sem aðstoða fólk sem hefur verið pyntað og með samtökum sem aðstoða fátækar konur. Það eru mörg samtök grasalækna um allan heim sem sinna sjálfboðavinnu. Ég vann aðallega með konum sem mögulega geta þá kennt áfram það sem ég kenndi þeim. Ég kynntist mörgu yndislegu fólki og lærði mikið sjálf,“ segir Anna Rósa.

„Fólk hefur ekki mikla möguleika á menntun í þessu landi, þarna er mikil fátækt og ein hæsta morðtíðni í heimi. Það er ekki auðvelt að vera þarna í höfuðborginni og ég fór ekkert um ein. Þetta er erfitt og einnig langur tími til að vera í burtu frá fjölskyldunni. En maður hefur gott af því að reyna þetta og kynnast öðrum aðstæðum.“

Fleiri námskeið



Í haust stefnir Anna Rósa á að fara til Bretlands og kenna en einnig að halda námskeið hér heima. Nánar má forvitnast um þau á vefsíðunni www.annarosa.is.

Ferjan út í Viðey fer frá Skarfabakka kl 13.15. Ferjugjald fyrir fullorðna er 1.200 kr. fram og til baka.