Starfsmanni Félags heyrnarlausra sem grunaður er um mansal sagt upp

Félag heyrnarlausra hefur sagt upp starfsmanni félagsins sem grunaður er um mansal. Um er að ræða mann sem var markaðs-og fjáröflunarstjóri en uppsögnin hefur þegar tekið gildi að því er segir í tilkynningu frá félaginu. Þar segir að einnig að innanhúsrannsók, sem lögmaður félagsins stýrði, hafi leitt í ljós alvarlegan trúnaðarbrest við félagið sem kallaði á tafarlausa uppsögn.

„Misbrestur hefur orðið á því hvernig fyrrum starfsmaðurinn stóð að uppgjöri á tekjum vegna sölu happdrættismiða, gagnvart sölufólki. Félag heyrnarlausra mun gera ráðstafanir til að rétta hlut þeirra sem hlunnfarnir hafa verið í viðskiptum við fyrrum starfsmanninn. Þrátt fyrir að félaginu beri ekki lagaleg skylda til þess, telur það siðferðilega skyldu sína að tryggja hlut þeirra sem hafa komið að sölu happdrættismiða þess,“ segir í tilkynningunni.

Fréttablaðið greindi fyrst frá því fyrir þremur vikum að lögreglan hefði til rannsóknar vinnumansalsmál innan Félags heyrnarlausra.

Samkvæmt heimildum blaðsins þurfti rússnesk kona sem kom hingað til lands til að selja happdrættismiða að borga 1000 dollara við komuna til landsins án þess að hafa hér atvinnuleyfi. Það hefur hún gert í tvígang. Hún hafi fengið um 20 þúsund krónur í laun á síðustu tveimur mánuðum. Þá hafi hún verið rukkuð fyrir skutl á vegum vinnuveitanda síns á þau svæði þar sem henni var gert að vinna, allt að 3000 krónur í hvert skipti.

Samkomulag Félags heyrnarlausra við fólkið er að þau fái 25% af sölu happdrættismiðanna í laun. Konan sem um ræðir í þessu máli fékk hinsvegar aðeins 15% af andvirði sölunnar. Daði segir að um samkomulag hafi verið á milli hennar og starfsmannsins gegn því að hún fengi fría gistingu á heimili hans.

Í tilkynningunni frá Félagi heyrnarlausa segir að ljóst er að innra eftirlit með sölumálum félagsins hafi brugðist.

 

„Þetta mál gefur því tilefni til að setja skriflegar verklagsreglur um samskipti félagsins við sölufólk og tryggja að uppgjör gagnvart því fari fram á réttan hátt.

 

Félag heyrnarlausra reiðir sig á stuðning almennings við að vinna að málefnum heyrnarlausra og er happdrættissala helsta tekjulind þess. Félag heyrnarlausra harmar gjörðir starfsmannsins og vonar að þær hafi ekki kastað rýrð á starfsemi félagsins sem er svo mikilvæg öllum heyrnarlausum,“ segir í tilkynningunni.