Samkvæmt tilkynningu í anddyri laugarinnar hefur samningi við Gym ehf, sem sá um líkamsræktaraðstöðu Sundlaugar Kópavogs, verið rift og þeim gert að fjarlægja öll tæki og tól án tafar. Handhöfum árskorta Sundhallar Kópavogs er boðið að fara í svokallað Sporthús, annars staðar í Kópavogi, til líkamsræktar og þar ku ekki vera nein sundlaug. Í samræðum við starfsfólk kom fram að það sé einnig alls óvíst að korthafar geti áfram fengið aðgang að sundlauginni. Það sem eftir lifir gildistíma útgefinna korta er því í raun tapað fé korthafa.
Það gerast kaup á eyrum landsins alla daga árið um kring og ekkert við það að athuga. Stundum þarf að endurnýja húsnæði og sinna viðhaldi og það er heldur ekkert við það að athuga. Það sem er athugavert við þessi eyrarviðskipti öll er að laugargestir með gild árskort sitja eftir með skarðan hlut. Við erum rekin upp úr eins og eitthvað hafi fundist á floti í lauginni.
Mitt árskort gildir til septemberloka 2016. Nú „býðst“ mér að fara í Sporthúsið í hinum enda Kópavogs til líkamsræktar og hef enga möguleika á laugarferð. Ég set „býðst“ innan gæsalappa því í raun eru þetta afarkostir, taktu þennan kost eða tapaðu peningum þínum ella.
Þetta er ekki hvorki Sundlaug Kópavogs né Gym ehf til sóma. Sem tryggur og ánægður viðskiptavinur Sundlaugar Kópavogs fram að þessu geri ég kröfu um að Sundlaug Kópavogs bjóði korthöfum að velja einn eftirfarandi valkosta:
- Að fá andvirði eftirstandandi gildistíma útgefinna árskorta endurgreitt.
- Að eftirstandandi gildistími árskorts gangi upp í nýtt árskort að laug og líkamsrækt þegar líkamsræktaraðstaðan opnar í haust (með nýjum rekstraraðila).
- Að andvirði eftirstandandi gildistíma árskorts gangi upp í árskort að lauginni.
Það kann að vera gott að búa í Kópavogi en að óbreyttu er vont að eiga viðskipti í Kópavogi, sérstaklega ef maður skiptir við Sundlaug Kópavogs.