Innlent

Handtökur í Guðmundarmáli varða líkflutning: Kunningi þegar viðurkennt að hafa flutt lík Guðmundar

Nanna Elísa Jakobsdóttir skrifar
Frá meðferð málsins árið 1978.
Frá meðferð málsins árið 1978. Vísir
Framkvæmd var húsleit í tengslum við handtökur tveggja manna sem eru taldir tengjast hinu svokallaða Guðmundar- og Geirfinnsmáli í fyrradag. Lögreglan framkvæmdi leitina og fór hún fram á heimili sambýliskonu annars þeirra. Morgunblaðið greinir frá þessu.

Samkvæmt heimildum blaðsins tengist rannsókn lögreglu á aðkomu þessara tveggja manna aðallega því hvort þeir hafi komið að flutningi á líki Guðmundar Einarssonar. Guðmundur hvarf árið 1974 og hefur ekki spurst til hans síðan. Árið 1980 var þó maður sakfelldur fyrir að hafa flutt líkið á Guðmundi Einarssyni. Hann dró aldrei framburð sinn tilbaka.

Sjá einnig: Ábending í Guðmundar- og Geirfinnsmáli ekki glæný



Líkamsleifar Guðmundar fundust aldrei en björgunarsveitir og lögregla leituðu hans um nokkra hríð þar til ákveðið var að hætta leit.

Sævar Cieselski játaði á sig morðið á Guðmundi en hann dró síðar játninguna tilbaka og hélt fram sakleysi sínu til dauðadags.
Næstum tveimur árum síðar, upp úr miðjum desember 1975, voru Erla Bolladóttir og Sævar Ciesielski í gæsluvarðhaldi hjá lögreglunni vegna póstsvikamáls. Í langri yfirheyrslu 20. desember það sama ár er Erla spurð hvort eitthvað sé hæft í þeim sögusögnum sem lögreglu hafi borist til eyrna, að Sævar hafi verið viðriðinn hvarfið á Guðmundi. Vitnisburður Erlu leiðir til handtöku Kristjáns Viðars Viðarssonar og Tryggva Rúnars Leifssonar í janúar 1976. 

Kunningi þegar játað á sig líkflutning

Þeir játuðu á sig glæpinn eftir nokkra daga í gæsluvarðhaldi, Sævar 10 dögum eftir handtöku og Tryggvi Rúnar 15 dögum eftir handtöku. Kristján Viðar viðurkenndi nokkrum dögum eftir handtöku að hafa verið á Hamarsbraut 11 þar sem átök hafi orðið en greint er frá þessum átökum í dómi Hæstaréttar sem finna má á vef Ríkislögreglustjóra.  

Grundvallaratriði í málinu varðar líkflutning þar sem Erla sagðist upphaflega hafa séð Sævar, Kristján Viðar og Tryggva Rúnar flytja lík í laki úr kjallaraíbúð sem hún bjó þá í ásamt Sævari. Síðar var Albert Klahn Skaftason nefndur í tengslum við líkflutning. Hann játaði við fyrstu skýrslutöku. 

Sjá einnig: Guðmundar- og Geirfinnsmálið: Tveir menn handteknir og yfirheyrðir

Líkið fannst þó aldrei sem fyrr segir. 

Sævar og Tryggvi drógu játningar sínar tilbaka á vormánuðum 1977. Kristján Viðar dró sinn framburð tilbaka í september 1977. Erla dró hins vegar sinn framburð aldrei tilbaka, ekki fyrr en við endurupptökubeiðni málsins árið 1997.

Erla Bolladóttir segir að það að vera höfð fyrir rangri sök láti hana aldrei í friði.vísir/gva
Fjórmenningarnir hafa síðan haldið fram sakleysi sínu og barist fyrir því ásamt ættingjum sínum að nafn þeirra verði hreinsað. Þau hafa haldið því fram statt og stöðugt að játningarnar hefðu fengist með vafasömum hætti, þau hefðu verið beitt líkamlegu og andlegu ofbeldi við yfirheyrslur og því neyðst til þess að játa á sig glæpinn.

Albert Klahn, sem viðurkenndi að hafa tengst flutningi á líki Guðmundar, hélt sig við sinn framburð við meðferð málsins en hann sagðist hafa flutt líkið frá Hamarsbraut út í Hafnarfjarðarhraun og síðar síðla sumars 1974 flutt það þaðan. Ekki er upplýst hvert. Hann var sakfelldur. 

Við endurupptökubeiðni árið 1997 sagðist hann ekki muna hvort hann hefði komið að Hamarsbraut þar sem átökin áttu sér stað. 

RÚV greindi frá því í morgun að mennirnir tveir sem handteknir voru í morgun hefðu áður komið við sögu lögreglu. Þá þekktu þau aðilana sem dæmdir voru í málinu 1980.

Endurupptökunefnd skoðar málið nú og ákveður síðar á árinu hvort tilefni sé til að taka málið upp að nýju.


Tengdar fréttir




Fleiri fréttir

Sjá meira


×