Strákarnir okkar með stærsta hjartað

Strákarnir okkar spila gegn Ungverjum í dag í þýðingarmiklum leik á EM í Frakklandi. 

Blaðamaður tók púlsinn á nokkrum eldheitum stuðningsmönnum íslenska landsliðsins.

 

Að rifna úr stolti yfir litla frænda

Ragnheiður Elín Árnadóttir, iðnaðarráðherra, verður gestur í „fyrir-brúðkaups-fótboltapartíi“ hjá þingmanninum Vilhjálmi Árnasyni  og Sigurlaugu, unnustu hans. „Til þess að tryggja að gestir mæti á tíma og verði í stuði hafa brúðhjónin sett upp skjá fyrir okkur veislugestina. Þetta er svona 2 fyrir 1 díll – bolti og brúðkaup!”

Ertu með hjátrú eða hefð þegar kemur að landsleikjum? 

„Ég er yfirleitt mjög hjátrúarfull og finn til ábyrgðar þegar mitt lið er að spila. Ég var mjög slæm með þetta þegar ég var sjálf að keppa í íþróttum. Mér er meinilla við breytingar og reyni að gera hlutina eins þegar vel gengur – horfa á með sama fólkinu, á sama stað o.s.frv. Það verður ekki núna þar sem ég var á vellinum í Frakklandi í fyrsta leiknum. Það kom til með stuttum fyrirvara og ég lagði ýmislegt á mig svo það gengi upp – til að mynda held ég að ég sé núverandi Evrópumeistari í 18 mínútna spretthlaupi á háum hælum eftir að hafa náð frá flugvél að lest í París á þriðjudaginn,“ segir Ragnheiður og hlær.

En hvernig er tilfinningin að horfa á frænda spila?

„Tilfinningin ein og sér þegar Hjörtur „litli“ frændi minn var valinn í hópinn var algjörlega stórkostleg – 21 árs frábær íþróttamaður sem við í fjölskyldunni erum að rifna úr stolti yfir. Ég vona svo sannarlega að við fáum að sjá hann spreyta sig í Frakklandi.“

Vel leikinn fótbolti eins og listdans

Vigdís Finnbogadóttir, fyrrverandi forseti, hefur gaman af fótbolta. Hún reynir að fylgjast alltaf með íslenskum landsliðum.

Mér finnst vel leikinn fótbolti eins og listdans. Ég hef áhuga á fótbolta eins og öllum íþróttum, ekki síst því dótturdóttir mín hefur æft fótbolta í nokkur ár. Svo stendur maður með sínu fólki. Ég hef ætíð gert það.

Vigdís vill engu spá fyrir um leikinn í kvöld, en leyfir sér að vona það besta.

En hver er lykillinn að velgengni landsliðanna okkar? „Einurð og þjálfun. Það er eins og í öllum greinum. Skilningur á því um hvað er að ræða skiptir höfuðmáli.“

 

Nú mega menn fara að vara sig!

Rúnar Freyr Gíslason leikari horfir á leikinn í góðra vinahópi á Kaffihúsi Vesturbæjar. 

„Við horfðum saman á Portúgalsleikinn, þannig að það hlýtur að vera happa.“

Ertu með hjátrú eða hefð þegar kemur að því að horfa á landsleiki? 

„Það er misjafnt. Ég var t.d. viss um að Portúgalarnir hefðu skorað bara vegna þess að ég fór að pissa! Maður getur verið svo órökréttur. Þú veist, ég veit alveg að strákarnir okkar vissu ekkert um mína klósettferð, en samt hélt ég í mér allan leikinn eftir þetta. Og það skilaði sér, við skoruðum jöfnunarmarkið!“

En Rúnar ætlar ekki að sitja heima lengi.

„Ég er á leiðinni út, ég verð í París þegar við vinnum Austurríkismenn og komumst áfram! Flýg út 20. júní, þannig að nú mega menn fara að vara sig.

Lars minnir Loga á afa sinn

Logi Pedro Stefánsson tónlistarmaður horfir á leikinn í útskriftarveislu eða í sólinni á Secret Solstice tónlistarhátíðinni. Hann spáir 2-1 sigri Íslendinga í dag og segist eiga  nokkra uppáhalds leikmenn í liðinu.

„Mér finnst Aron Einar mjög töff. Frábær gaur og skepna á vellinum.

Jón Daði flott týpa. Svo er Raggi Sig flottur líka, hann náði mér alveg á sitt band í myndinni Jökullinn logar.  Birkir Már Valsari. Gott lið í heildina.“

En Lars Lagerbäck, er hann svalasti fótboltaþjálfarinn?

„Hann er flottur. Minnir mig stundum á afa.“

Strákarnir okkar með stærsta hjartað

Hallbera Guðný Gísladóttir, landsliðskona í fótbolta, er gríðarlega spennt fyrir leiknum. Sjálf gefur hún strákunum góð ráð, enda áður keppt á stórmóti.

„Þið komið kannski frá minnsta landinu en þið eruð með stærsta hjartað og farið langt á því.

Njótið augnabliksins, þið eruð að skrifa nýjan kafla í íþróttasöguna!“

 

Með fótboltabullu í Breiðholti

Mikael Torfason rithöfundur, ætlar að horfa á leikinn heima hjá sér í Breiðholti með fjölskyldunni. 



„Það eru allir velkomnir að sjálfsögðu. Á heimilinu er ein fótboltabulla úr sjötta flokki Fjölnis sem mun öskra í stofunni í 90 mínútur ef ég þekki hann rétt. Ég fer svo út sjálfur til að sjá Ísland vinna Austurríki í París.

Hver er uppáhaldsleikmaðurinn þinn? 

„Auð­vitað er ég sturlaður Eiðsmaður eins og flestir og hef verið það lengi. Eiður er stórkostlegur fótboltamaður og ekkert smá ánægjulegt að sjá hann loksins á stórmóti.“

Er Lars Lagerbäck nettasti gaur í heimi? 

„Uh, já. Og ekki bara það heldur skín af honum svo góður þokki. Þetta er yfirvegaður og góður stjórnandi sem er bæði hrokalaus og auðvitað snillingur þegar kemur að taktík í fótbolta.“

 

 

Sígó rétt fyrir hálfleik tryggir gott gengi

Emmsjé Gauti ætlar að horfa á leikinn á stóru tjaldi á Secret Solstice tónlistarhátíðinni í Laugardal. Hann segist enga hjátrú hafa fyrir leiki Íslands.

„Nei, ég er ekki svo klikkaður. Frændi minn trúir því hins vegar að liðið sem hann heldur með skori ef hann fær sér sígó rétt fyrir hálfleik.“

Hver er uppáhaldsleikmaðurinn þinn í liðinu? 

„Það er auðvitað Aron Gunnarsson. Hann er ekki bara skotfastur og góður leikmaður, hann er líka góðhjartaður og skynsamur ungur drengur sem elskar rapptónlist. Annars er ég líka drullufúll að þeir hafi skilið módelið hann Rúrik Gíslason eftir heima. Leikirnir eru ekki jafn fallegir án hans.“

Við tökum þetta!

Gunnlaugur Helgason dagskrárgerðarmaður, betur þekktur sem Gulli Helga, er einarður stuðningsmaður íslenska liðsins.

Hann spáir góðu gengi liðsins í leiknum í dag.

„Ungverjar skora fyrsta markið. En við tökum þetta! Leikurinn endar 2-1.“