Staða Aldísar óbreytt

„Ákvörðun um stöðu fyrrverandi yfirmanns fíkniefnadeildar lögreglunnar á höfuðborgarsvæðinu hefur ekki verið tekin,“ segir Sigríður Björk Guðjónsdóttir lögreglustjóri. Frá því hefur verið greint að Aldís Hilmarsdóttir, sem gegndi stöðu yfirmanns fíkniefnadeildar lögreglunnar, hafi heyrt í fréttatíma Ríkisútvarpsins í vikunni, að hún kæmi ekki til með að taka við sinni fyrri stöðu á ný. „Enda væri hún sú fyrsta sem fengi að frétta af því ef einhverjar breytingar væru fyrirhugaðar, en ekki fréttastofa Ríkisútvarpsins.“

Aldís var flutt til í starfi í janúar síðastliðnum, en tilfærslan kom til á sama tíma og tveir starfsmenn fíkniefnadeildarinnar sættu rannsókn annars vegar ríkissaksóknara og hins vegar héraðssaksóknara vegna gruns um brot í starfi.

Annað málanna varðaði lögreglufulltrúa sem sakaður var um að veita grunuðum upplýsingar um fíkniefnamál sem voru til rannsóknar. Rannsókn leiddi ekki í ljós neina athugaverða háttsemi og hefur lögreglufulltrúa þessum verið boðið að koma aftur til starfa. Hann þáði það. Hitt málið er enn á borði ríkissaksóknara.

Aldísi voru falin sérverkefni á sviði samhæfingar rannsókna á skipulagðri glæpastarfsemi þegar hún vék til hliðar. Annar stjórnandi, Runólfur Þórhallsson, tók við verkefnum er sneru að rannsóknum fíkniefnamála og raunar fleiri verkefnum hjá embættinu, samhliða skipulagsbreytingum hjá embættinu sem voru innleiddar í janúar.

Fréttin birtist fyrst í Fréttablaðinu 18. júní.