Ökufantar og gúmmítöffarar eru að gera Vesturbæinga brjálaða

Íbúar í Vesturbænum að gefast upp á óhljóðum, ískri og reykspóli. Þar er allt við að sjóða uppúr. Í gærkvöldi tók steininn úr og má sjá óþreyju Vesturbæinga brjótast út í Facebookhópi sem helgaður er málefnum borgarhlutans. Borgarfulltrúi segir ástandið orðið gersamlega óboðlegt.

Guðmundur Guðmundsson ríður á vaðið og beinir orðum sínum til borgarfulltrúans Kjartans Magnússonar og spyr hvað Reykjavíkurborg ætli að gera í þessum „djöfulgangi sem dverghnakkar á Impresum og annar óþjóðalýður stendur fyrir á fögrum sumarNÓTTUM vestur í bæ?? Þessa stundina eru óhljóðin, ískrið og spólið að spilla næturfriði alls vesturbæjarins. Þetta er ólíðandi, en eins og þú veist er lögreglan ekki í stakk búin til að taka á þessu. Eiga vesturbæingar að taka málin í sínar hendur? Þetta er algerlega óboðlegt.“

Yfirvöld standa ráðþrota gagnvart vandanum

Fjölmargir sem tjá sig á þessum vettvangi kannast við óbærilegt ástand og segja þetta með hinum mestu ólíkindum.

Vísir fjallaði um málið ítarlega um málið fyrir um hálfum mánuði en svo virðist sem ástandið fari einfaldlega versnandi dag frá degi. En þetta snýst um það sem kennt hefur verið við ökuleikni og snýr að því að reykspóla og láta dekkin væla. Einkum er bílastæðaplanið fyrir framan Bykó úti á Granda nefnt í þessu sambandi. Auk þess sem hraðakstur er stundaður grimmt, ekki síst á Hringbraut, og þá á bílum sem ekki eru með hljóðkútum. Telja þeir sem til þekkja einungis tímaspursmál hvenær þarna verða alvarleg slys. Lýsa ýmsir sem tjá sig á umræddum vettvangi yfir miklum áhyggjum vegna þessa. En yfirvöld standa ráðþrota gagnvart vandanum.

Á það er bent að lögreglan hafi reynt að stemma stigu við vandanum en um leið og lögreglan hverfur af vettvangi halda ökuníðingarnir uppteknum hætti.

Kjartan Magnússon lýsir því að hann hafi verið staddur á reiðhjólastígnum á norðanverðum Grandanum ásamt syni sínum þegar mestu lætin dundu yfir og er sammála því að þetta sé óboðlegt.

Borgarfulltrúi á vettvangi

„Á bakaleiðinni hjóluðum við framhjá „kvartmílubrautinni“ og þar var þá komið fjölmennt lögreglulið á tveimur bílum og þremur bifhjólum til að skakka leikinn og sá ég að lögregluþjónar voru að taka skýrslur af a.m.k. tveimur ökuþórum. Oft hef ég komið ábendingum og óskum til lögreglunnar um að stemma stigu við þessum háska- og hávaðaakstri og jafnoft hafa þeir útskýrt fyrir mér að málið sé erfitt viðureignar. Um leið og lögreglan birtist dettur allt í dúnalogn en um leið og hún hverfur, verður fjandinn laus að nýju.“

Kjartan segir Sjálfstæðismenn í borginni hafi lagt fram tillögur um að gripið verði til aðgerða til að stemma við ofsaakstri á þessu svæði. „Þær hafa greinilega ekki dugað til en þó voru hraðahindranir settar á Ánanaust í kjölfar tillögu frá okkur á árinu 2012 ef ég man rétt. Rétt er að hafa í huga að við borgarfulltrúar höfum ekki boðvald yfir lögreglunni og getum því ekki skipað henni fyrir verkum en ég hef óspart komið ábendingum á framfæri við hana um hin ýmsu mál, þar á meðal þetta.“