Óvenju tæpt hjá Barcelona

Guðjón Valur Sigurðsson skoraði fjögur mörk þegar Barcelona vann tveggja marka sigur, 29-31, á Granollers í lokaumferð spænsku úrvalsdeildarinnar í handbolta í dag.

Þetta var 28. sigur Barcelona í jafnmörgum deildarleikjum og liðið fór því í gegnum deildina án þess að tapa stigi þriðja árið í röð.

Börsungar unnu leikinn í dag reyndar með minni mun en þeir gera venjulega en þeir slökuðu á í seinni hálfleik eftir að hafa leitt í hálfleik, 14-19.

Makedóníumaðurinn Kiril Lazarov var markahæstur í liði Barcelona með fimm mörk en Guðjón Valur, Wael Jallouz og Eduardo Gurbindo komu næstir með fjögur mörk hver.