Stefnir í mesta vöruskiptahalla frá hruni

Mikill viðsnúningur hefur orðið í vöruskiptum við útlönd á síðustu misserum og að óbreyttu bendir allt til þess að hallinn í ár verði sá mesti frá því fyrir hrun. Gylfi Magnússon dósent í viðskiptafræði við Háskóla Íslands segir þetta ekki vera áhyggjuefni því tekjur af ferðaþjónustu vinni gegn þessum halla.

Vöruskiptajöfnuður mælir verðmæti útflutnings og innflutnings og sé hann neikvæður þýðir það að Íslendingar eru að eyða meira í kaupa erlendar vörur en þeir fá fyrir sinn útflutning.

Á árunum fyrir hrun var vöruskiptajöfnuðurinn almennt neikvæður. Þannig var hann neikvæður uppá tæpa 160 milljarða árið 2006 og rúma 92 milljarða árið 2007.

Eftir hrun snerist dæmið hins vegar við og í sex ár í röð voru Íslendingar að flytja út meiri verðmæti en sem nam innflutningi. Á síðustu misserum hefur þetta verið að breytast á ný samkvæmt tölum Hagstofunnar. Í fyrra var vöruskiptajöfnuðurinn neikvæður upp á 30 milljarða og á fyrstu fimm mánuðum þessa árs er hann neikvæður upp á 45 milljarða.

Gylfi Magnússon dósent við viðskiptafræðideild HÍ segir þetta ekki vera áhyggjuefni. Sá vöxtur sem hafi einkennt ferðaþjónustuna undanfarin ár vinni gegn þessum halla.

„Það er alveg rétt að það kom stutt tímabil þar sem vöruviðskiptin voru í miklum plús þegar innflutningur hrundi. Sérstaklega árið 2009 og 2010. En nú er innflutningurinn að glæðast talsvert og hraðar en útflutningurinn þannig að það er kominn smá mínus þarna. Það er í sjálfu sér ekki til þess að hafa áhyggjur af vegna þess að á móti kemur að þjónustuútflutningur hefur vaxið mjög mikið og munar þar mest um ferðamennskuna. Þannig að í heild eru viðskiptin við útlönd í plús og í sjálfu sér ekki útlit fyrir annað en að þau verði það á næstu árum,“ segir Gylfi Magnússon