Innlent

Landlæknir segir ekki æskilegt að bjóða gjaldfrjálsa heilbrigðisþjónustu

Gunnar Atli Gunnarsson skrifar
Formaður Vinstri grænna segir að afla þurfi aukinna tekna til að standa undir gjaldfrjálsri heilbrigðisþjónustu. Landlæknir segir það hvorki raunhæft né æskilegt enda séu gjöld notuð til að stýra fólki á rétt þjónustustig.

Undanfarið hafa þingmenn og annað áhrifafólk innan stjórnarandstöðunnar talað fyrir því að bjóða eigi upp á gjaldfrjálsa heilbrigðisþjónustu í íslenska heilbrigðiskerfinu. Katrín Jakobsdóttir, formaður Vinstri grænna, er ein þeirra en hún segir mörg dæmi þess að tekjulágt fólk leiti sér ekki nauðsynlegrar læknisþjónustu af efnahagsástæðum og það sé óviðunandi í okkar samfélagi. Því ætti að fella niður komugjöld í heilbrigðiskerfinu og að fjármagna ætti þau útgjöld með endurskoðuðum auðlegðaskatt og hækkun veiðigjalda.

„Ég held að það sé í raun og veru bara eðlilegt að við öflum aukinna tekna til þess að standa undir gjaldfrjálsri heilbrigðisþjónustu. Og það hefur verið bent á það að það frumvarp sem heilbrigðisráðherra er núna með fyrir þinginu um að jafna þessa þátttöku (greiðsluþátttöku sjúklinga, innsk. blm), sem er í sjálfu sér góð meginhugsun, að það myndi ekki kosta nema sex og hálfan milljarð að gera þá þjónustu sem það frumvarp snýst um gjaldfrjálsa,” segir Katrín.

Birgir Jakobsson, landlæknir, segir það ekki raunhæft markmið að stefna að gjaldfrjálsri heilbrigðisþjónustu.

„Nei, ég er ekki einu sinni viss um að það sé æskilegt markmið. Vegna þess þar sem ég þekki til að þá eru gjöld notuð til þess að stýra fólki á rétt þjónustustig. Og ég held að það sé ekki rétt leið að hafa alveg gjaldfrjálsa heilbrigðisþjónustu,” segir Birgir.

Þá sé ekki góð hugmynd að fella niður komugjöld í heilbrigðiskerfinu.

„Ég held að það eigi að vera lægri komugjöld þar sem að við viljum að fólk sæki fyrst þjónustu, eins og í heilsugæslunni. En þá dýrari komugjöld ef þú sækir beint þjónustu til sérfræðinga.”

Stjórnmálamenn ættu að fara varlega í að boða gjaldfrjálsa heilbrigðisþjónustu.

„Það er sjálfsagt ákveðin leið til þess að veiða atkvæði, en mér finnst það ekki vera mjög heiðarleg kosningabarátta, ef ég á að segja alveg eins og er,” segir Birgir.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.