Allur fatnaður kemur að góðum notum

Landsmenn fengu á dögunum sendan poka merktan Rauða krossi Íslands og þeir hvattir til að setja í hann allan þann fatnað sem liggur ónotaður í geymslum og fataskápum. Pokunum má skila í grenndargáma en þá má finna um land allt.

„Þetta er árlegt átak sem Rauði krossinn fer í í samstarfi í Eimskip, og svo er Pósturinn svo vænn ad dreifa pokunum fyrir okkur inn á öll heimili í landinu. Í fatapokana á að fara öll vefnaðarvara, til dæmis gamlar gardínur, slitin handklæði og notuð nærföt eða skór. Ég held að það eina sem myndi teljast ónothæft eru tuskur frá bílaverkstæðum. Annars þiggjum við alla vefnaðarvöru og hún kemur að góðum notum," segir Björn Teitsson, upplýsingafulltrúi Rauða krossins á Íslandi.

„Þetta fer allt í flokkunarmiðstöðvar. Við reynum svo að velja úr allan þann fatnað sem hægt er að endurselja og svo er einnig mikið flutt úr landi til endursölu og endurvinnslu. Þetta eru umhverfisvænar leiðir til að lengja líftíma fatnaðar og vefnaðarvöru og fullnýta hana."

Björn segir merkjanlegar sveiflur í magni fatnaðar sem ratar í gámana.

„Frá því að þetta verkefni fór af stað um síðustu aldamót þá var stöðug aukning á magni fatnaðar sem kom í gámana hjá okkur. Þetta datt aðeins niður í kjölfar hruns og fólk fór að halda að sér höndum og kannski halda að sér fatnaði. En nú er alveg blússandi sigling," segir hann.

Til samanburðar má hér sjá annars vegar magn af fatnaði sem ratar í endurvinnslu í gegnum Rauða krossinn og hins vegar í tonnum talið magn á fatnaði sem fluttur er inn hingað til lands. Þess ber að geta að inn í þeim tölum er ekki fatnaður sem landsmenn kaupa sjálfir á erlendri grundu.

Björn segir það algengan misskilning að föt sem fólk lætur frá sér fari mest í klæða íbúa fátækari ríkja heims.

„Það er aldrei gert, nema að mjög vel athuguðu máli. Ástæðan er sú að í fátækari ríkjum er grunnefnahagur oft byggður á vefnaðarvöruframleiðslu og við viljum ómögulega vera að hrófla við því," segir hann.

„Undantekning á þessarri reglu er til dæmis þegar Ebólu-faraldur geysaði á vesturströnd Afríku fyrir tveimur árum. Til að sporna við útbreiðslu veirunnar þurfti að brenna mikið af vefnaðarvöru og þá var talið mikilvægt að senda þangað fatnað. Slíkt er almennt eingöngu gert að mjög vel ígrunduðu máli."

Til að reyna að lengja líftíma fatnaðar hér á landi og nýta fötin sem best hefur Rauði krossinn lagt aukna áherslu á fataverslanir sínar víða um land.

„Við leggjum okkur fram um að bæta úrvalið og velja þangað vandaðari fatnað svo hann verði aðlaðandi fyrir neytendur," segir Björn.