Lewis Hamilton á ráspól á Spáni

Lewis Hamilton á Mercedes var fljótastur í tímatökunni fyrir spænska kappaksturinn. Nico Rosberg á Mercedes varð annar og Daniel Ricciardo á Red Bull var þriðji.

Max Verstappen, sem kom til Red Bull fyrir þessa keppni varð fjórði. Hamilton setti einaldlega tíma undir lok þriðju lotu sem enginn átti svar við. Rosberg var næstum þremur tíundu úr sekúndu á eftir.

Það þykir einkar erfitt að taka framúr á brautinni í Barselóna. Tímatakan er því gríðarlega mikilvæg. Í síðustu 15 keppnum á brautinni hefur maðurinn á ráspól unnið 13 keppnir.

Formúlu 1 liðin æfa á Barselónabrautinni á veturna. Liðin og ökumenn þekkja því brautina mjög vel og kunna að stilla bílunum upp fyrir hana.

Felipe Massa á Williams datt út í fyrstu lotu tímatökunnar. Hann ræsir því 18. en Valtteri Bottas liðsfélagi Massa endaði lotunna í sjöunda sæti. Skellur fyrir Massa, sem hefur aldrei náð að vinna liðsfélaga sinn í tímatöku á Barselónabrautinni.

Auk Massa datt Jolyon Palmer út á Renault ásamt Sauber og Manor ökumönnunum.

Mercedes menn voru fyrstir út á brautina í annarri lotu. Öðrum lá ekki eins mikið á að komast út á brautina. Max Verstappen átti góðan sprett í annarri lotu, hann var þriðji í annarri lotu um hálfri sekúndu á undan Daniel Ricciardo, nýja liðsfélaga sínum hjá Red Bull.

Í annarri lotu duttu Nico Hulkenberg á Force India, Jenson Button á McLaren, Daniil Kvyat á Toro Rosso, Kevin Magnussen á Renault og Haas ökumennirnir.

Lewis Hamilton gerði mistök í fyrstu tilraun síðustu lotu. Hann læsti báðum framdekkjum og tapaði miklum tíma. Eftir fyrstu tilraun munaði átta tíundu á milli Mercedes ökumanna þar sem Rosberg leiddi og Verstappen tróð sér á milli þeirra.

Í loka tilraun síðustu lotunnar setti Hamilton hring sem enginn gat svarað. Ferrari var hvergi og getan sem liðið hafði sýnt á æfingum í gær og í morgun var ekki til staðar þegar á reyndi.

Bein útsending frá keppninni hefst klukkan 11:30 á morgun á Stöð 2 Sport.

Hér fyrir neðan má sjá öll úrslit helgarinnar.