Um fimmtungur heimila varð eldi að bráð í Fort McMurray

Um fimmtungur heimila í og við borgina Fort McMurray í Kanada hefur orðið skógareldum að bráð. Frá þessu er greint á vef fréttastofu breska ríkisútvarpsins BBC sem hefur eftir kanadíska þingmanninum David Yurdiga að enduruppbyggingin gæti tekið mörg ár.

Rúmlega 100 þúsund íbúar borgarinnar og í nágrenni hennar var gert að rýma heimili sín og yfirgefa svæðið. Eldarnir hafa geisað í rúma viku en yfirvöld telja að hægt hafi á útbreiðslu þeirra yfir helgina.

Er talið að þeir nái nú yfir um sextánhundruð ferkílómetra svæði, en á laugardag náðu þeir yfir átjánhundruð ferkílómetra svæði.

Yurdiga sagði í samtali við BBC að ekki sé óhætt fyrir íbúa sem þurftu að yfirgefa heimili sín að snúa aftur.

„Um 20 prósent heimilanna varð eldi að bráð, en meirihluti þeirra stendur þó enn óskemmdur,“ sagði Yurdiga. „Ástandið er því mun skárra en talið var í upphafi.“