Aron með sjö í Makedóníu

Aron Pálmarsson skoraði sjö mörk í þriggja marka sigri Veszprém, 26-29, á Vardar í fyrri leik liðanna í 8-liða úrslitum Meistaradeildar Evrópu í handbolta í dag.

Sigurinn kemur Veszprém í góða stöðu fyrir seinni leikinn í Ungverjalandi eftir slétta viku.

Aron klikkaði bara á einu skoti í leiknum en hann var næstmarkahæstur í liði Veszprém á eftir Momir Ilic sem gerði níu mörk.

Leikurinn var jafn framan af en stöðunni 7-7 gáfu ungversku meistararnir í og skoruðu fimm mörk í röð.

Þremur mörkum munaði á liðunum í hálfleik, 9-12, en leikmenn Vardar komu ákveðnir til leiks í seinni hálfleik og jöfnuðu metin.

En Aron og félagar gengu frá leiknum með 6-1 kafla um miðbik seinni hálfleiks. Þeir unnu svo að lokum þriggja marka sigur, 26-29.