Sögulega lítið fylgi þjóðarleiðtoga

Lítill stuðningur við Sigurð Inga Jóhannsson, nýjan forsætisráðherra, hefur komið fram í skoðanakönnunum frá því að hann tók við embætti í síðustu viku. Hafa ýmsir reynt að setja stuðning við hann og sitjandi ríkisstjórn í sögulegt samhengi, til að mynda á hinu vinsæla spjallsvæði Pírata á Facebook nú í kvöld.

Þar er dregin fram umfjöllun breska miðilsins The Telegraph um nokkra af óvinsælustu leiðtogum lýðræðisríkja heimsins í nóvember árið 2013. Tilefnið var það að Francois Hollande Frakklandsforseti mældist um það leyti með aðeins fimmtán prósenta fylgi í skoðanakönnunum.

Sjá einnig: Draghölt ríkisstjórn

Miðlinum tókst ekki að finna dæmi um það að nokkur leiðtogi lýðræðisríkis, í það minnsta á okkar tímum, hefði notið minna fylgis í skoðanakönnunum en Alejandro Toledo, fyrrverandi forseti Perú, gerði árið 2004.

Toledo mældist þá með átta prósenta fylgi meðal þjóðar sinnar eftir að hvert spillingarmálið á eftir öðru hafði komist upp og á meðan rúmur helmingur landsmanna var undir fátæktarmörkum. Hann hékk þó í embætti til ársins 2008.

Til samanburðar má nefna að hinn ástralski Paul Keating og hinn japanski Yukio Hatoyama, þeir forsætisráðherrar sem mælst hafa með minnst fylgi í hvoru landinu fyrir sig, náðu báðir botninum í sautján prósenta fylgi. Hatoyama sagði af sér þegar þetta met var slegið árið 2010.

Engin forseti Bandaríkjanna hefur mælst með minna fylgi en Harry S. Truman, sem náði 22 prósenta fylgi undir lok forsetatíðar sinnar. Metið á Bretlandseyjum er svipað, það á Gordon Brown sem naut stuðnings 23 prósenta sinnar þjóðar sem forsætisráðherra árið 2009.

Sjá einnig: Lítið traust borið til nýrrar ríkisstjórnar

Engin skoðanakönnun hefur farið fram á trausti til Sigurðar Inga fyrstu dagana hans í embætti sem samsvarar nákvæmlega þeim könnunum sem hér að ofan er vitnað til og kallast á ensku „approval rating“. Nýjasti Þjóðarpúls Gallúp, sem út kom í gær, gefur þó ekki til kynna að Sigurður Ingi njóti vinsælda umfram þá þjóðarleiðtoga sem The Telegraph fjallaði um.

Þar kemur fram að fimm prósent þjóðarinnar segjast helst vilja Sigurð Inga Jóhannsson sem forsætisráðherra af þeim stjórnmálamönnum sem lagðir voru fyrir í könnuninni. Katrín Jakobsdóttir með 37 prósent, Bjarni Benediktsson með tuttugu prósent og Helgi Hrafn Gunnarsson með sex prósent mældust öll með meira fylgi en sitjandi forsætisráðherrann.

Líklegt verður að teljast að þetta vantraust almennings beinist ekki beint að störfum Sigurðar Inga, sem aðeins hefur gegnt embættinu í ellefu daga, en Framsóknarflokkurinn og sitjandi ríkisstjórn hafa siglt pólitískan ólgusjó frá því að fjallað var um tengsl Sigmundar Davíðs Gunnlaugssonar, formanns flokksins, við aflandsfélagið Wintris.

Líkt og fram hefur komið, hefur ríkisstjórn Framsóknarflokksins og Sjálfstæðisflokksins gefið það út að þingkosningum verði flýtt og þær fari fram næsta haust.

Uppfært 23.20:Í upphaflegri útgáfu þessarar fréttar var lagt upp með að bera saman þann stuðning sem Sigurður Ingi mældist með í Þjóðarpúlsi Gallup við það fylgi sem óvinsælustu þjóðarleiðtogar annarra lýðræðisríkja mældust með á sínum tíma. Ónákvæmt er að stilla þessum niðurstöðum upp hlið við hlið, þar sem ekki er um nákvæmlega sambærilegar kannanir að ræða, og hefur fréttin verið lagfærð í samræmi við það.