Steypustöð neitar kröfu Rauðku um brotthvarf

Félag athafnamannsins Róberts Guðfinnssonar á Siglufirði, Rauðka, krefst þess að steypustöðin Bás hverfi af núverandi stað á Tanganum svokallaða.

Í bréfi til Báss vísar lögmaður Rauðku til samkomulags við yfirvöld í Fjallabyggð frá í apríl 2012. Þar komi fram að forsvarsmenn Rauðku telji umrætt svæði ekki samrýmast „hugmyndum þeirra um um heildarmynd af því umhverfi sem þeir óska að starfa í“. Rauðka myndi byggja hótel og golfvöll og koma að uppbyggingu skíðasvæðis bæjarins.

Lögmaðurinn segir að fljótlega eftir að samkomulagið var gert við bæinn hafi Róbert Guðfinnsson fyrir hönd Rauðku og skyldra félaga gert munnlegt samkomulag við fulltrúa Báss „um flutning fyrirtækisins af svæðinu gegn því að Bás ehf. myndi sitja eitt og án útboðs að allri jarðvegsvinnu og steypusölu“ fyrir hótelið og golfvöllinn.

„Við erum ekkert að fara,“ svarar Hilmar Zophoníasson, stjórnarformaður Báss. „Forsvarsmenn Báss hafa ekki gert neitt samkomulag við Róbert Guðfinnsson. Það hafa verið viðræður í gangi um þennan flutning en það náðust bara ekki samningar. Málið er hjá okkar lögfræðingi.“

Lögmaðurinn Rauðku segir hins vegar í fyrrnefndu bréfi óumdeilanlegt að Bás hafi skuldbundið sig til að flytja burt gegn því að sitja að vinnu við uppbyggingu golfvallarins og hótelsins. Bás hafi fengið úthlutað lóð sem fyrirtækið hafi óskað eftir á hafnarsvæðinu. Ágreiningur sé nú um hvaða eignir Rauðka hafi skuldbundið sig til að kaupa af Bás og á hvaða verði.

„Bás ehf. hefur í stað þess að flytja af svæðinu nú óskað eftir viðbótarlóð og hyggst því starfa áfram á svæðinu og virða þannig samkomulag fyrirtækjanna að vettugi. Með því hefur Bás ehf. bæði brotið margnefnt samkomulag og auk þess valdið Rauðku ehf. og skyldum félögum þess tjóni,“ skrifar lögmaður Rauðku og stingur upp á að matsmaður meti andvirði eignanna sem um ræðir.

„Verði Bás ehf. ekki við þessari kröfu sér Rauðka ehf. og skyld félög sig knúin til að leita til dómstóla til að fá kröfunni framgengt sem og að krefjast skaðabóta.“ 

Fréttin birtist fyrst í Fréttablaðinu 2. apríl.