Krefjast tekna af ferðamönnum

Borgaryfirvöld skorar á Stjórnstöð ferðamála að beita sér fyrir því að sveitarfélög fái tekjur af ferðamönnum. Dagur B. Eggertsson borgarstjóri skrifar að krafan sé ekki flókin: gistináttagjald renni til sveitarfélaga.

„Þetta er einfalt í innheimtu og víða um heim rennur gistináttagjaldið eða svokallaður „city tax“ til sveitarfélaga. Aukinn straumur ferðamanna til landsins hefur í för með sér gríðarlegt álag á gatnakerfi, umhirðu og innviði sveitarfélaga. Tekjur af virðisaukaskatti, gistináttagjaldi og öðrum sköttum af ferðafólki renna hins vegar allar í ríkissjóð en ekki til nærsamfélagsins. Það er óásættanlegt. Það er forgangsmál að breyta þessu og mikilvæg prófraun á hvort tilvist stjórnstöðvarinnar er yfirhöfuð til einhvers,“ segir Dagur og bætir við að tilefni tillögunnar sé meðal annars þær yfirlýsingar Ragnheiðar Elínar Árnadóttur, ráðherra ferðamála, í síðustu viku að sérstök gjaldtaka af ferðaþjónustu væri ekki forgangsmál vegna þess að ríkissjóður njóti nú þegar milljarða skatttekna af ferðaþjónustu.

„Málflutningur ráðherra dregur í raun fram hversu óréttlátt það er að sveitarfélög beri fyrst og fremst kostnað af aukinni ferðaþjónustu á meðan ríkið hagnast gríðarlega. Aðgerðaleysi í þessu efni kemur hins vegar ekki til greina.“

Fréttin birtist fyrst í Fréttablaðinu 2. apríl.