Líf og fjör í skíðabrekkum landsins í dag

Svo virðist sem fátt sé því til fyrirstöðu að skella sér á skíði í dag en skíðasvæði landsins eru öll meira og minna opin og færi með ágætum.

Skíðasvæðið á Dalvík er opið í dag frá klukkan 10 til 16. Að sögn staðarhaldara er þar nú logn, skýjað og 3 stiga hiti og skíðfærið prýðilegt. 

Skíðasvæði Tindastóls verður að sama skapi opið í dag frá klukklan 11 til 16. Vindhraði var um 5 metrar á sekúndu, alskýjað og rúmlega 1 gráðu hiti á tíunda tímanum í morgun. Þar er enn nægur og góður snjór í fjallinu samkvæmt staðkunnugum.

Líf og fjör verður í Hlíðarfjalli í Eyjafirði í dag. Þar er opið frá klukkan 10 til 16 og veðrið ásættanlegt, 1 gráðu hiti og 4 metrar á sekúndu. Þar verður skíða og brettaskóli frá klukkan 10 til 12 sem og frá 10-14. 

Icelandic Winter Games er þá ennþá í fullum gangi í fjallinu og þar fer fram meistaramót Íslands í„BIG AIR“ á snjóbrettum og freeski frá klukkan 13 til 16.

Í Bláfjöllum fer fram Skíðalandsmót Íslands í göngu þar sem opið verður frá klukkan 10 til 17. Þar er nú austan 6 metrar á sekúndu og 1 gráðu hiti. Þá verður keppni í alpagreinum í Skálafelli í dag.