Mótmæla við Downing stræti 10 að íslenskri fyrirmynd

„Íslendingar sættu sig ekki við spilltan forsætisráðherra og við ættum ekki að gera það heldur,“ segja þeir sem hafa boðað til mótmæla fyrir utan forsætisráðherrabústaðinn í Downingstræti 10 í Lundúnum. David Cameron, forsætisráðherra Breta, hefur viðurkennt að hafa átt hlut í aflandsfélagi föður síns. Hann seldi sinn hlut með hagnaði fjórum mánuðum áður en hann varð forsætisráðherra.

Mikill þrýstingur hefur verið á Cameron í Bretlandi eftir að Panama-skjölin leiddu í ljós að faðir hans heitinn, Ian Cameron, stofnaði félag á Bahama-eyjum, Blairmore Holdings, á níunda áratug síðustu aldar sem gerði honum kleift að forðast skattgreiðslur á Bretlandseyjum.

Tæp tvö þúsund manns hafa boðað komu sína á mótmælin fyrir utan Downingsstræti og hafa 5,4 þúsund lýst yfir áhuga á þeim á viðburðasíðu mótmælanna á Facebook.

Þeir sem boða til mótmælanna segja ljóst að David Cameron og fjölskylda hans hafi hagnast gífurlega á skattaskjólum á meðan hann hefur sjálfur talað um hversu ósanngjörn slík skjól eru.

„Hann er lygari og hræsnari og kominn tími á að hann segi af sér.“

Cameron hafði farið undan í flæmingi vegna málsins þar til í gær þegar hann viðurkenndi að hafa keypt hlut í aflandsfélagi föður síns fyrir 12,5 þúsund pund og seldi fyrir 30 þúsund pund, sem nemur um 5,2 milljónum íslenskra króna miðað við gengi dagsins í dag.

Forsætisráðherrann ítrekaði að hagnaður vegna félagsins hafi ávallt verið gefinn upp til skatts.