Vranjes svarar Guðmundi fullum hálsi: „Snýst ekki bara um að taka heldur líka að gefa“

Lítil ást ríkir á milli danska handknattleikssambandsins og þýska stórliðsins Flensburg eftir að síðarnefnda liðið neitaði að sleppa frá sér fimm dönskum leikmönnum í landsliðsverkefni á þeim degi sem Guðmundur Guðmundsson vildi fá þá.

Danir eru að undirbúa sig fyrir forkeppni Ólympíuleikana þar sem þeir eru í riðli með Króatíu, Noregi og Bareil en riðillinn verður leikinn í Herning í Danmörku 8.-10. apríl næstkomandi. Tvö lið fara upp úr riðlinum og til Ríó.

Formleg landsleikjavikja hefst 4. apríl en Guðmundur ætlaði að ná tveimur óopinberum æfingaleikjum áður en liðið mætir Þýskalandi á föstudaginn. Hann vildi fá allan hópinn saman 29. mars en í staðinn þurfti hann að aflýsa tveimur æfingaleikjum.

Fimm leikmenn í danska landsliðshópnum leika með Flensburg sem neitar að sleppa þeim lausum fyrir 31. mars. Leikmennirnir sem um ræðir eru þeir Anders Eggert, Henrik Toft Hansen, Kevin Möller, Rasmus Lauge Schmidt og Lasse Svan Hansen.

„Að sjálfsögðu er ég vonsvikinn,“ sagði Guðmundur í samtali við TV2 um málið. „Við heyrðum ekkert frá Flensburg fyrr en í fyrradag [Skírdag]. Mér finnst þetta mjög undarlegt.“

Ljubomir Vranjes, þjálfari Flensburg, gefur lítið fyrir ásakanir danska liðsins en Guðmundur gekk svo langt með að segja:

„Flensburg á sér langa sögu af því að vilja ekki að leikmenn liðsins spili með landsliðum sínum. Leikmenn á borð við Holger Glandorf, Michael Knudsen og Thomas Mogensen hafa allir lagt landsliðsskóna á hilluna.“

Sjá einnig:Ljubomir Vranjes hafnaði HSÍ

Vranjes viðurkennir fúslega að Flensburg hafi fengið dagskrána frá danska landsliðinu í júlí á síðasta ári en segir að á þeim tíma hafi hann ekkert vitað hvernig dagskrá síns eigins liðs væri.

„Ég vil bara það besta fyrir danska landsliðið en það verður að upplýsa okkur betur. Ég er þjálfari Flensburg og hugsa bara um það sem er best fyrir mitt lið. Þess vegna vil ég núna að mínir menn fái frí. Danirnir eiga að fagna því þannig leikmennirnir verði í betra formi. Ég er ekki á móti þessari aukaæfingu danska liðsins. Ég skil hana mjög vel en þetta snýst ekki bara um að taka heldur líka að gefa,“ segir Ljubomir Vranjes í viðtali við þýska miðla.

„Þessi vika sem um ræðir er ekki Alþjóðleg landsliðsvika. Hún hefst ekki fyrr en fjórða apríl en Danir vildu fá leikmennina 29. mars. Landsliðin hafa leyfi til að fá leikmennina í 60 daga á ári. Með öllum stórmótunum er dagskráin alveg nógu erfið þannig ég er bara að passa að mínir menn lendi ekki í meiðslum. Ég reyndi að finna lausn með danska sambandinu en það tók ekki vel í mínar hugmyndir. Samskiptin hafa ekki verið nógu góð,“ segir Ljubomir Vranjes.