Ófrægingarmenn sagðir hamast í yfirburðamanninum Sigmundi Davíð

Þorsteinn Sæmundsson þingmaður Framsóknarflokksins ritar grein sem Vísir birti þar sem hann hellir sér yfir þá sem hafa gagnrýnt Sigmund Davíð Gunnlaugsson forsætisráðherra í kjölfar fregna um að kona hans geymi fúlgur fjár, fjölskylduarfinn, á Jómfrúreyjum.

Þorsteinn hefur mál sitt á að lýsa afrekum og í raun yfirburðum Sigmundar. Og víkur þá máli sínu að þeim sem hafa viljað gagnrýna forsætisráðherra.

Lágkúrlegt ófrægingartal minnipokamanna

„Ófrægingarmönnum virðast sárna þessi staðreynd kannski vegna þess að þeir höfðu ekki kjark og þor til að ráðast til atlögu við kröfuhafa. Ófrægingarmennirnir þola ekki að forsætisráðherra á alla kosti sem þá skortir. Hann á framsýni kjark og dug sem þeir eiga ekki. Þess vegna hefur þetta ógæfufólk hamast á forsætisráðherra hvern dag í þrjú ár en auðvitað án árangurs því niðurrifið og hælbitin efla Sigmund Davíð í hverri raun,“ skrifar Þorsteinn sem hefur þegar fengið góðar viðtökur við þessum skrifum á samfélagsmiðlum, meðal samflokksmanna sinna. Hann er sagður tala mannamál.

Vigdís Hauksdóttir er meðal þeirra sem deilir grein Þorsteins og hún spyr, í umræðu á eigin Facebookvegg: „... viljið þið vera svo væn að benda mér á hvar lögbrot hefur átt sér stað? Þetta mál er keyrt áfram af lægstu hvötum mannkyns - vænisýki og afbrýðisemi - en það kunna vinstri menn best af öllum - það ætlaði allt af hjörum á síðasta kjörtímabili - út í mig - þegar ég gerði athugasemdir við að tveir makar ráðherra fengu úthlutað listamannalaunum úr ríkissjóði !!!“





Og svo enn sé gripið niður í reiðilestur þingmannsins:

„Hvað tekur ófrægingarliðið þá til bragðs?  Jú, það skrifar nýjan kafla í lágkúruumræðu sinni með því að beina spjótum sínum að eiginkonu forsætisráðherra vegna þess að hún á eignir. Og hvað haldiði nema þau fái ekki í lið með sér hjárænulegan Sjálfstæðisþingmann sem er í vandræðum með sjálfsmynd sína. Það eru tíðindi að Sjálfstæðisþingmaður láti vinstrið siga sér eins og rakka vegna einhverrar minnimáttakenndar.“

Þarna víkur Þorsteinn að gagnrýni Vilhjálms Bjarnasonar og má ljóst vera að grunnt er á því góða milli þingmanna stjórnarflokkanna um þessar mundir. Matthías Imsland, aðstoðarmaður forsætisráðherra, hafði áður haldið því fram að hann viti ekki neinn Framsóknarmann sem treysti Vilhjálmi.

Ógæfufólk í pólitík

Þorsteinn segir það lengi hafa verið þekkta staðreynd að eiginkona forsætisráðherra sé vel efnuð og engin leynd hafi verið um hvernig þær eignir eru til komnar.

„En hælbítarnir gefast ekki upp enda eru pólísk samtök þeirra við það að þurrkast út. Það ætti ekki að koma neinum á óvart sem fylgst hefur með framgöngu þeirra undanfarin ár.“

Þorsteinn spyr, og tekur þar undir með formanni sínum sem ritaði grein um málið fyrir skemmstu: „Viljum við að íslensk stjórnmálaumræða snúist um fjölskyldumeðlimi stjórnmálamanna? Fjölskyldumeðlimi sem eru ekki þátttakendur í stjórnmálum.  Þurfa stjórnmálamenn framvegist að gera ráð fyrir því að fjölskyldur þeirra verði fyrir áreiti og dylgjum vegna þess að makinn er í pólitík? Mitt svar er nei. Til þess að svo megi verða þarf ógæfufólkið í pólitík að gaumgæfa vel framgöngu sína.“