Telur Fjólu sniðgengna af fáfróðum í ráðuneyti

Snædís Rán Hjartardóttir segist enn bíða eftir breytingum eftir að hún vann mál sitt gegn ríkinu sem hún höfðaði vegna þess að Sam­skiptamiðstöð heyrn­ar­lausra og heyrnar­skertra synjaði henni um end­ur­gjalds­lausa túlkaþjón­ustu.

Þar að auki segir Snædís að félag fólks með samþætta sjón - og heyrnarskerðingu, Fjóla, hafi verið sniðgengið af ráðuneytinu við drög að breytingum á reglugerð um miðstöðina.

„Síðan dómurinn féll hef ég verið að bíða eftir breytingum en þær láta ekki sjá sig, að vísu eru til drög að breytingum á reglugerð um Samskiptamiðstöð fyrir heyrnalausa og heyrnarskerta en þau virðast ekki taka á grunnvandanum og voru auk þess ekki samin í samráði við hagsmunafélagið mitt,“ segir Snædís.

Að sögn Snædísar fengu þau ekki að vita af málinu fyrr en frestur til að senda inn umsagnir var runninn út. Þá hafi upplýsingarnar komið frá Félagi heyrnarlausra en ekki ráðuneytinu sjálfu.

„Við fengum samt á endanum að segja eitthvað um þetta. Af hverju gleymdist að láta Fjólu vita þrátt fyrir að um helsta hagsmunafélag fólks með samþætta sjón-og heyrnarskerðingu sé að ræða? Þessi fáfræði sýnir fram á þörfina fyrir auknum skilningi á sérstöðu og hagsmunum þessa fólks,“ segir Snædís Rán.

Ásamt systur sinni, Áslaugu Ýri, kvikmyndagerðarkonunni Söndru Helgadóttur og Guðnýju Katrínu Einarsdóttur, ráðgjafa hjá Fjólu, safnar Snædís fyrir gerð heimildarmyndar á Karolina Fund. Með myndinni ætla þær að fræða bæði stjórnvöld og almenning um stöðu fólks með þessa tegund fötlunar.

Guðný Katrín segist upplifa í sínu starfi almenna vanþekkingu á málefnum fólks með samþætta sjón- og heyrnarskerðingu. „Það ríkir líka vanþekking hjá ríkinu gagnvart því mikilvæga starfi sem fer fram hjá Fjólu. Til dæmis lækkaði árlegur styrkur ríkisins til félagsins úr 1.500.000 í fyrra, niður í 395.000 krónur í ár. Fyrir lítið félag er það mikill niðurskurður,“ segir Guðný Katrín Einarsdóttir.