Misneyting á starfsfólki og húsnæðisvandi eins og í upphafi baráttunnar

Nú þegar blásið er til hátíðahalda í tilefni aldarafmælis Alþýðusambands Íslands minnir Gylfi Arnbjörnsson, forseti sambandsins, á sigra í baráttu vinnandi fólks og áhrif ASÍ á samfélagið allt.

„Það er ljóst að á þessari hundrað ára vegferð sem sambandið hefur starfað er æði margt sem hefur verið á verkefnaskrá,“ segir Gylfi. „Fyrir utan hin beinu kjör og kjarasamninga um laun og vinnuaðstæður þá er engin launung á því að félagsmenn hafa notað sambandið til að ná fram landvinningum í velferðarmálum, menntamálum, húsnæðismál hafa auðvitað verið mjög fyrirferðarmikil, í lífeyrismálum og vegna veikindaréttar. Allt þetta er tilefni til að rifja upp, því þetta gerðist ekki að sjálfu sér. Þetta er búin að vera fórnfús og þrálát barátta í hundrað ár.“

Sami húsnæðisvandi og í upphafi baráttunnar

Þótt að baráttan hafi skilað miklu segir Gylfi áskoranir þær sem blasi við í dag séu þær sömu og áður, baráttunnar verði alltaf þörf.

„Það kemur í ljós að brýnustu úrlausnarefni okkar í dag eru dálítið keimlík því sem var í upphafi,“ segir hann. „Ég nefni til dæmis átak okkar, Einn rétt- ekkert svindl. Við erum að glíma við að sum fyrirtæki eru að misnota aðstæður erlendra starfsmanna, sérstaklega unga fólksins. Við erum líka að sjá vanda í húsnæðismálum og í rauninni er sama umræða um húsnæðismál og var nánast í upphafi okkar baráttu. Það segir okkur að þessari baráttu lýkur aldrei, við þurfum að standa vaktina og sækja fram.“

Mikil veisluhöld verða á fjórum stöðum á landinu í tilefni af aldarafmælinu. Gylfi segir dagskrána viðamikla. Hann hvetur fólk til að mæta á opið hús í Hörpu í dag á milli tvö og rúmlega hálf fimm en færri komast að en vilja á tónleika sem haldnir eru í kvöld á Ísafirði, Neskaupsstað, Akureyri og Reykjavík.

„Í dag ætlum við að halda upp á afmælið og bjóðum hér á höfuðborgarsvæðinu upp á veislu í Hörpu. Í dag er þar opið hús á milli tvö og rúmlega fimm. Ýmislegt er á dagskrá, bæði frumflytja Hundur í óskilum sína sýn á sögu hreyfingarinnar, þá ætla Úlfur Úlfur og Páll Óskar að troða upp í Norðurljósasalnum og eitt og annað er á dagskrá.  Síðan bjóðum við upp á tónleika í kvöld víðs vegar um landið.  Verða þar margt frábærra listamanna sem ætla að skemmta okkur. Það fór þannig að við buðum þjóðinni svo það er orðið fullt á þessa tónleika.“