Sóttu ferðamann sem féll á myndavél

Björgunarsveitin Stefán í Mývatnssveit sótti í dag mann sem hafði slasast við Víti við Kröflu. Maðurinn rann til í hálku og féll á myndavél sem hann bar um hálsinn. Þetta kemur fram í tilkynningu frá Landsbjörg.

Maðurinn fann fyrir öndunarerfiðleikum eftir fallið og treysti sér ekki til að standa upp. Hlúð var að ferðamanninum á staðnum áður en honum var komið á börur og hann fluttur í sjúkrabíl sem beið hans skammt frá Kröfluvirkjun. Þaðan var hann fluttur til Akureyrar til frekari rannsókna.