Kosningabandalag spennandi kostur

Stjórnarskrárnefnd birti á dögunum drög að þremur frumvörpum til stjórnskipunarlaga, sem nú eru í umsagnarferli. Óljóst er hvort þessar tillögur komist yfir höfuð til umræðu á Alþingi, því Píratar höfnuðu því í vikunni að styðja þinglega meðferð, og á flokkstjórnarfundi Samfylkingar í gær reyndist enginn stuðningur við tillögurnar. Katrín Jakobsdóttir, formaður Vinstri grænna, á sæti í stjórnarskrárnefnd.

„Eins og staðan er núna þá var ætlunin sú að þingið fengi tilbúnar tillögur - þær eru ekki tilbúnar - og ef þingið myndi afgreiða þær þá gæti þjóðin fengið tækifæri til þess að hafna þeim eða samþykkja í þjóðaratkvæðagreiðslu. Ef þessir flokkar vilja ekki hleypa málinu til þings eða þjóðar, áður en tillögurnar eru tilbúnar, þá finnst mér það kannski ekki endilega rétt leið. Ég held það sé betra að nefndin fái að minnsta kosti að ljúka störfum.“

Bandalagið yrði ekki bara um stjórnarskrána

Ný stjórnarskrá hefur verið sérstakt baráttumál stjórnarandstöðuflokkanna og meðal annars verið rætt um að koma á bandalag flokkanna fyrir næstu þingkosningar, en er líklegt að af því verði nú?

„Ég hef talað fyrir því að við skoðum möguleikann á einhvers konar kosningabandalagi. Vissulega þar sem stjórnarskrármálið yrði eitt af stóru málunum en líka önnur mál eins og til dæmis hvernig við ætlum að leysa úr stöðunni í heilbrigðisþjónustunni. Ég held að það væri mjög spennandi kostur að stjórnmálahreyfingarnar væru mjög skýrar í því hverjum þær vilji vinna með og um hvaða málefni.“ 

Einblínt um of á einstaklinga umfram málefni

Ljóst er að Katrín hefur sjálf gríðarlegt persónufylgi en gerir lítið úr því þegar spurt er hvort ekki liggi beint við að hún leiði kosningabandalagið.

„Svoleiðis bandalag þarf að byggjast upp á málefnum og mér finnst við oft allt of upptekin af því að tala um einstaklinga en ekki málefni þegar við erum að ræða þessi mál, en það hlýtur alltaf að byggja á málefnum fyrst og fremst.“

Og þótt hún njóti enn yfirburðastuðnings til embættis forseta samkvæmt könnunum hyggst hún ekki endurskoða hug sinn.

„Nei. En ég er viss um að Íslendingar eigi eftir að velja sér góðan forseta.“