Starfsfólk Vonta vissi af konunum

Fyrrverandi starfsmaður í fyrirtæki manns sem grunaður er um vinnumansal í Vík segir starsfólk hans hafa vitað að tvær konur frá Sri Lanka störfuðu á heimili hans. Framkvæmdastjóri Starfsgreinasambandsins segir nauðsynlegt að yfirvöld hér á landi marki skýra stefnu varðandi ábyrgð fyrirtækja þegar kemur að brotum undirverktaka.

Maðurinn, sem dæmdur var í þrjátíu daga gæsluvarðhald eftir að tvær konur voru frelsaðar af heimili hans á fimmtudag, átti og stýrði fyrirtækinu Vonta International sem var undirverktaki fyrir Icewear. Nokkrir einstaklingar voru í vinnu hjá fyrirtækinu og höfðu vinnuaðstöðu og aðgang að sauma - og prjónavélum í húsakynnum Icewear í Vík.

Fréttastofa ræddi við fyrrverandi starfsmann Vonta International sem vildi ekki láta nafn síns getið. Sagði hann að starfsfólk Vonta hafi vitað að konurnar tvær hafi dvalið í húsi mannsins sem grunaður er um mansal. Hann hafi farið með fatnað sem saumaður var af starfsfólki Vonta í húsakynnum Icewear heim til sín þar sem konurnar hafi séð um frágang á þeim.

Eigendur Icewear hafa varist frétta af málinu en Ágúst Þór Eiríksson, framkvæmdastjóri Icewear, sagði í samtali við fréttastofu í gær að málið tengdist fyrirtæki hans ekki beint og að hvorki hann né annað starfsfólk hefði vitað af tilvist kvennanna.

Fyrir áramót kom upp annað mál tengt manninum þar sem talið var að hann væri með starfs­fólk í vinnu sem ekki til þess réttindi. Þeim starfsmönnum var vísað úr landi en fyrirtækið hélt áfram að starfa fyrir Icewear allt þar til á fimmtudag.

Drífa Snædal, framkvæmdastjóri Starfsgreinasambandsins, segir að stærri fyrirtæki verði að sýna ábyrgð.

„Varðandi Icewear sérstaklega, og fyrirtæki sem eru með undirverktaka, þá þarf náttúrlega að koma upp keðjuábyrgð,“ segir hún.

Þannig geti kaupandi þjónustu ekki fríað sig ábyrgð þegar kemur að brotum undirverktaka.

„Þetta er reyndar skilgreint sem ein stærsta ógn á vinnumarkaðnum í heiminum í nýrri skýrslu Sameinuðu þjóðanna sem var kynnt fyrir tveim dögum síðan. Það er þessi keðjuábyrgð. Fjármagnið er hreyfanlegra en fólk þannig að fjármagnið leitar þangað sem lægstu launin eru, eða þar sem fólk kemst upp með að greiða lægstu launin. Þannig að við erum að sjá hnattrænt vandamál og við þurfum að fara virkilega vel yfir það hvernig við getum bætt okkur svo að svona mál komi ekki fyrir,“ segir Drífa Snædal.