Ólafur og félagar með sjö stiga forskot á toppnum

Ólafur Guðmundsson, landsliðsmaður í handbolta, og félagar hans í sænska úrvalsdeildarliðinu Kristianstad unnu öruggan sigur á Malmö, 29-21, á útivelli í kvöld.

Topplið Kristianstad var sex mörkum yfir í hálfleik, 15-9, en aðeins var spurning um hversu stór sigur gestana yrði. Hann varð á endanum átta mörk.

Ólafur skoraði fimm mörk úr fimm skotum fyrir Kristianstad sem er, eftir sigurinn í kvöld, með 44 stig, sjö stigum meira en Alingsås sem er í öðru sætinu.

Kristianstad er aðeins búið að tapa einum leik af 23 í deildinni og stefnir hraðbyri að deildarmeistaratitlinum. Sænska liðið hefur verið í miklu stuði að undanförnu og náði sterku jafntefli gegn Kielce í Meistaradeildinni í síðustu viku.

Annað Íslendingalið, Ricoh, tapaði í kvöld á heimavelli, 24-18, fyrir Lugi. Lugi er í baráttu um sæti í úrslitakeppninni en Ricoh er í tíunda sæti með þrettán stig eftir tapið í kvöld.

Lugi var þremur mörkum yfir í hálfleik, 13-10, og náði mest fimm marka forskoti í seinni hálfleik, 21-16. Heimamönnum gekk illa að saxa á forskot gestanna.

Magnús Óli Magnússon koraði fjögur mörk úr fimm skotum fyrir Ricoh, þar af eitt úr vítakasti, en Tandri Már Konráðsson átti ekki góðan dag og skoraði aðeins eitt mark í sex tilraunum.