Íþróttafræði kennd á Akureyri en ekki Laugarvatni

Endurskoðun á kennaranámi við Háskólann á Akureyri gerir ráð fyrir að á næsta skólaári verði boðið upp á nám í íþróttafræðum við háskólann.

Lagt er til á sama tíma í skýrslu að leggja niður Íþróttafræðasetrið á Laugarvatni og flytja það til Reykjavíkur. Skýrslan var unnin að beiðni Kristínar Ingólfsdóttur, fyrrverandi rektors HÍ, sem þáttur í að móta framtíðarstefnu og fyrirkomulag um staðsetningu náms í íþrótta- og heilsufræði við Menntavísindasvið skólans.

Haraldur Einarsson, þingmaður Framsóknarflokksins í Suðurkjördæmi, segir það auðvitað reiðarslag ef skólanum verði lokað á Laugarvatni. „Ég svo sem veit ekki á þessu stigi málsins hvort þetta tengist að einhverju leyti en lagt er til í skýrslu HÍ að Akureyri taki að sér kennslu í íþróttakennarafræðum. Við þingmenn í Suðurkjördæmi munum áfram vinna að því að skóli á Laugarvatni verði áfram starfræktur,“ segir Haraldur.

Eyjólfur Guðmundsson, rektor Háskólans á Akureyri, segir ákvörðun skólans um breytingar á námsframboði í kennarafræðum ekki til komnar vegna skýrslu HÍ. „Við höfum ekki rætt við Háskóla Íslands um íþróttakennaranám. Við erum að taka ákvörðun um breytt námsframboð á okkar eigin forsendum.“ Hér erum við heldur ekki að tala um íþróttakennaranám sem slíkt heldur kennaranám með íþróttafræði sem kjörsvið,“ segir Eyjólfur.