Þrenging vegna hjólastígs á Grensásvegi boðin út að nýju

Samþykkt var á borgarstjórnarfundi í gærkvöldi að bjóða út þrengingu Grensásvegs að nýju. Útboðið var auglýst um helgina án þess að borgarstjórn hefði samþykkt fyrirhugaðar breytingar á veginum en það dregið til baka fyrir fundinn.

Halldór Halldórsson, oddviti Sjálfstæðismanna í borginni, furðaði sig á auglýsingu útboðsins í gær. Hann kveðst ánægður með það að borgin hafi dregið það til baka og viðurkennt mistök.

„Það var náttúrulega bara eðlilegt, það varð að gerast,“ segir Halldór. „Það var ekki verið að virða leikreglur lýðræðisins. Borgarstjórn er æðsti vettvangurinn og tekur þær ákvarðanir sem þarf að taka.“

Minnihlutinn ósáttur með framkvæmdirnar

Verkið felst í því að fækka akreinum á Grensásvegi milli Miklubrautar og Bústaðavegs og koma þar fyrir hjólastíg. Heimild til þess að bjóða verkið út var naumlega samþykkt á fundi borgarráðs þann 21. janúar.

Þar sem ekki náðist samstaða um málið í borgarráði þurfti að taka það fyrir á fundi borgarstjórnar. Útboðið var auglýst um helgina en umhverfis- og skipulagsráð frestaði því í gær og baðst velvirðingar. Það er þó ljóst eftir fundinn í gær að verkið verður boðið út að nýju.

„Það er alveg einbeittur vilji meirihlutans í þessu máli,“ segir Halldór. „Við vorum ekki sammála því, á síðasta borgarstjórnarfundi lögðum við til að hætta við þetta. Þau felldu þá tillögu.“

Halldór segir minnihlutann vera þeirrar skoðunar að að minnsta kosti eigi að bíða með framkvæmdirnar á Grensásvegi, sem eiga að kosta um 170 milljónir, ekki síst í ljósi hagræðingar sem þarf að eiga sér stað hjá borginni á næstunni.

„Það er svo skrýtið að þegar maður skoðar slysaskráninguna, þá eru engin skráð slys á þessum hluta Grensásvegs,“ segir hann. „Hinsvegar eru gatnamót Grensásvegar og Miklubrautar hættulegustu gatnamót á Íslandi. Það á ekkert að gera við þau.“