Heildarkostnaður við hver banaslys um 660 milljónir

Samfélagslegur heildarkostnaður við hvert banaslys í umferðinni er um 659,6 milljónir króna og hvert alvarlegt slys 86,4 milljónir. Sjúkrakostnaði hefur ekki verið haldið aðskildum sérstaklega fyrir þessi slys.

Þetta kemur fram í svari Kristjáns Þórs Júlíussonar heilbrigðisráðherra við fyrirspurn Vilhjálms Árnasonar, þingmanns Sjálfstæðisflokksins, um kostnað heilbrigðiskerfisins af umferðarslysum.

Velferðarráðuneytið hefur ekki tekið saman upplýsingar um hvað umferðarslys kosta heilbrigðiskerfið árlega, að sögn Kristjáns. Hann bendir hins vegar á skýrslu frá Hagfræðistofnun Háskóla Íslands frá árinu 2012 þar sem fram kom að kostnaður vegna umferðarslysa árið 2009 hafi verið um 700 milljónir króna, sem svari til 930 milljónum króna á núverandi verðlagi. Þá komi fram í nýrri skýrslu frá 2014 að áætlaður heildarkostnaður á verðlagi 2013 vegna umferðarslysa sé 48.486 milljónir króna fyrir árið 2015, ef undan séu skilin óhöpp án meiðsla.

Sjúkrakostnaður er ekki skilgreindur sérstaklega í þessum tölum, en ályktað er í skýrslunni að sjúkrakostnaðurinn sé líklega metinn allt of lágur í tölum Hagfræðistofnunar.

Allt að hundrað manns á Reykjalundi vegna umferðarslysa

Vilhjálmur spurði jafnframt hversu margir að jafnaði séu á endurhæfingardeildum vegna umferðarslysa og hvert hlutfall þeirra af heildarfjölda á endurhæfingardeildum sé. Í svari Kristjáns segir að á Landspítalanum hafi alls nítján einstaklingar verið skráðir á endurhæfingardeild spítalans vegna afleiðinga umferðarslysa árið 2015, eða eitt prósent. Þeir hafi ýmist verið lagðir inn á deild eða komu í dagdeildar- eða göngudeildarmeðferð. Á Reykjalundi hafi á árabilinu 2010 til 2015 komið níutíu til hundrað sjúklingar á ári til endurhæfingar í kjölfar umferðarslysa.

Nær engir sjúklingar voru lagðir inn á endurhæfingardeild á Sjúkrahúsinu á Akureyri vegna umferðarslysa síðastliðin ár, enda flestir sem lenda í alvarlegum slysum sendir á Landspítalann. Þá liggja ekki fyrir upplýsingar um hlutfall sjúklinga sem komu á Heilsustofnun NLFÍ í Hveragerði.