Skólamatur hækkar í verði

Sveitarfélagið Skagafjörður er með lægsta verðið á skóladagvistun með hressingu og hádegismat, eða 22.953 krónur á mánuði. Hæsta verðið er hjá Garðabæ, 35.745 kr./mán., en það er 12.792 kr. verðmunur á mánuði eða 56%.

Verðlagseftirlit ASÍ kannaði breytingar á gjaldskrám fyrir skóladagvistun ásamt hressingu og hádegismat fyrir yngstu nemendur grunnskólanna hjá 15 fjölmennustu sveitarfélögum landsins. Ekki er tekið tillit til seðilgjalda eða annarra innheimtugjalda, sem leggjast ofan á gjöldin sem innheimt eru jafnvel í tvennu lagi. Einnig er oft í boði ávaxtastund og mjólkuráskrift á skólatíma sem er heldur ekki tekin með í samanburðinum.

Í könnuninni kemur fram að ­þrettán sveitarfélög af þeim fimmtán sem skoðuð voru hafa hækkað gjaldskrána fyrir hádegismat milli ára. Þá hafa tólf sveitarfélög af þeim fimmtán sem eru til skoðunar hækkað hjá sér gjaldskrána fyrir skóladagvistun með hressingu á milli ára.

Mjög misjafnt er hvað foreldrar þurfa að greiða fyrir hádegismatinn, en munurinn er allt að 43% á milli sveitarfélaganna. Hæsta gjaldið er hjá Ísafjarðarbæ en þar kostar máltíðin 480 kr. en lægsta gjaldið er 335 kr. hjá Akraneskaupstað sem er 145 kr. verðmunur.

Lægsta mánaðargjaldið fyrir skóladagvistun er í Vestmannaeyjum á 14.165 kr. Hæst er gjaldið 25.980 kr. hjá Garðabæ. Verðmunurinn er 11.815 kr. eða 83%.