Klæddu þig rétt fyrir skíðaferð

Það er ekki þykk dúnúlpa yfir einni peysu sem heldur bestum hita á manni þegar skíðað er, heldur eru það nokkrar þunnar flíkur undir vatns- og vindþéttri úlpu sem andar.

Loftið sem myndast á milli flíkanna undir úlpunni virkar eins og einangrun og úlpa sem andar hleypir út raka. Skíðabuxurnar eiga auðvitað einnig að vera vatns- og vindþéttar og anda eins og úlpan.

Algengasti undirfatnaðurinn fyrir skíðaiðkendur er úr pólýester sem heldur þeim þurrum. Ullarundirföt þykja einnig ágæt. Þau eru hlý og það kemur síður svitalykt í þau.

Bómullarflíkur ber að varast. Þær draga í sig raka eins og svampur og það veldur því að manni verður kalt. Þunn ullarpeysa yfir undirfatnaðinum og flíspeysa þar utan yfir er skynsamlegur klæðnaður.

Sokkarnir eiga gjarnan að vera alvöruskíðasokkar. Þeir eru þykkir á vissum stöðum og þynnri á öðrum þannig að vel fari um fótinn í skíðaskónum. Góðir skíðavettlingar eru að sjálfsögðu mikilvægir.

Gæta þarf þess að skíðahjálmurinn sé af réttri stærð. Hann á að sitja þétt að höfðinu. Þegar skíðagleraugu eru keypt á að máta þau yfir hjálminn.

Til þess að skíðaferðin verði sem ánægjulegust er vert að huga að þessu:

1. Varasalvi og sólarvörn

Þegar sólin fer að hækka á lofti er nauðsynlegt að bera á sig sólarvörn heima áður en haldið er af stað í skíðabrekkuna og bera svo aftur á andlitið í brekkunni. Varasalvi er einnig nauðsynlegur og hafa ætti hann með sér í ferðina eins og sólarvörn. 

2. Feitt andlitskrem

Þegar kuldinn er mikill og vindur blæs er gott að bera feitt krem á andlitið.

3. Buff á höfuð og háls

Gott er að vera með aukabuff í vasanum. Þegar veðrið er slæmt er gott að setja það um hálsinn og fyrir andlitið.

4. Farsími

Ekki gleyma að setja farsíma í vasann. Hann getur verið nauðsynlegt öryggistæki.

5. Orkubiti

Súkkulaðibiti eða nokkrar hnetur, sem auðveldlega má geyma í úlpuvasa, geta komið að gagni þegar þreyta fer að gera vart við sig.