Dæmd fyrir að hóta fjölskyldu lögreglumanns og fleira

Hæstiréttur hefur dæmt konu í sex mánaða fangelsi vegna ítrekaðra þjófnaðarmála, brot gegn valdstjórninni, fjársvika og fíkniefnabrota. Hæstiréttur mildaði þar með dóm Héraðsdóms Reykjavíkur sem hafði dæmt konuna í tólf mánaða fangelsi.

Konan var dæmd fyrir að hafa í október 2014 hótað að drepa fjölskyldu lögreglumanns í lögreglubíl á leið frá slysadeild Landspítalans að lögreglustöðinni á Hverfisgötu.

Konan var einnig dæmd fyrir að hafa meðal annars stolið handsprittbrúsa á Landspítalanum, kardemommudropum úr verslunum, auk þess að hafa pantað sér og drukkið rauðvínsglas á Grand Hótel án þess að greiða fyrir veitingarnar og fyrir að hafa stolið þremur litlum vínflöskum. Þá hafi hún verið gripin með 0,69 grömm af amfetamíni innanklæða.

Konan á langan sakaferil að baki, en þegar litið sé til hans og umfangs brotanna, sem öll séu talin smávægileg, þyki hæfilegt að dæma konuna í sex mánuða fangelsi.