Ætlar að deila 86 milljóna lottóvinningi með börnum sínum

Það var ánægður eldri borgari á Suðurlandi sem varð svo heppinn að vera einn af þremur sem deildu með sér tvöfalda pottinum í Víkingalottóinu síðastliðinn miðvikudag. Hann vann rúmar 86 skattfrjálsar milljónir sem hann ætlar að deila með börnum sínum.

Maðurinn segist í samtali við Íslenska getspá lengst af verið í tveimur störfum. Nú hugsi hann aðallega um hvað þessi vinningur geti nýst börnum sínum vel. Hann hefur reglulega spilað lottó og segist alltaf kaupa fimm sjálfsvalsraðir í Víkingalottói og eina röð í EuroJackpot.

Hann sá vinningstölurnar á netinu á laugardagskvöld en það var ekki fyrr en hann fór vel yfir neðstu röðina á miðanum að hann sá að hann var vinningshafinn. Konan hans var ekki heima þegar hann veitti þessu athygli og segir hann biðina eftir að hún kæmi heim hafa verið nokkuð langa. Þegar hún kom heim bað hann hana um að lesa fréttirnar um vinninginn og að lestri loknum tilkynnti hann henni að þau hefðu hreppt stóra vinninginn. Konan átti bágt með að trúa honum en sannfærðist ekki fyrr en hún var búin að skoða miðann sjálf, að því er segir í tilkynningu frá Íslenskri getspá.