Dökkt útlit með loðnuvertíð

Samkvæmt loðnumælingum Hafrannsóknastofnunar, sem hófust rétt eftir áramót og lauk á fimmtudag, er veiðistofn loðnu um 675 þúsund tonn.

Í samræmi við nýja aflareglu verður heildaraflamark á vertíðinni 2015/2016 því aðeins 173 þúsund tonn að meðtöldum þeim afla sem búið var að veiða þegar mælingar fóru fram.

Ný aflaregla, sem stjórnvöld ákváðu að taka upp vorið 2015, byggir á því að skilja eftir 150 þúsund tonn til hrygningar með 95% líkum.

Fyrri aflaregla gerði ráð fyrir að skilja eftir 400.000 tonn af veiðistofni til hrygningar, og samkvæmt henni má gefa sér að ráðgjöf Hafrannsóknastofnunar hefði hljóðað upp á um það bil 275 þúsund tonn, eða um 100 þúsund tonnum meiri afla en nú.