Samkomulagi náð vegna slökkviliðsstjóra sem sagt var upp eftir 22 ára starf

Héraðsnefnd Árnesinga, stjórn Brunavarna Árnessýslu (BÁ) og Kristján Einarsson, fyrrverandi slökkviliðsstjóri, hafa náð samkomulagi um starfslok Kristjáns og mun nýr slökkviliðsstjóri taka við.

Í tilkynningu frá BÁ eru Kristjáni þökkuð vel unnin störf fyrir BÁ þar sem hann gegndi stöðu slökkviliðsstjóra frá árinu 1994. Jafnframt er Kristjáni þakkað fyrir óeigingjarnt framlag hans við eldvarnir og brunamál í Árnessýslu og ekki síst hans þátt í því verkefni að sameina slökkviliðin í þeim átta sveitarfélögum sem nú standa að Brunavörnum Árnessýslu í eitt lið.

Líkt og Vísir greindi frá í október var Kristjáni sagt upp störfum vegna þess að fagráð brunavarna taldi hann hafa hækkað laun sín og aðstoðarslökkviliðsstjóra án þess að hafa til þess heimild.

Sjá einnig: Slökkviliðsstjóri með 22 ára reynslu rekinn vegna ósamþykktrar 250 þúsund króna launahækkunar

Uppsögnin var að sögn Kristjáns fyrirvaralaus en hann hafði starfað hjá slökkviliðinu í 22 ár og alla tíð verið á bakvöktum án þess að þiggja fyrir þær greiðslur. Kristján sagðist hafa fengið grænt ljós á frá fyrrverandi formanni stjórnar BÁ, Eyþóri Arnalds, um að hann og aðstöðvarslökkviliðsstjóri fengu greiddar 250 krónur á mánuði sem bakvaktagreiðslur. Eyþór þvertók fyrir að nokkur slík heimild hafi verið gefin.

Sjá einnig: Segist aldrei hafa gefið grænt ljós á 250 þúsund króna bakvaktagreiðslur

80 slökkviliðsmenn hjá Brunavörnum Árnessýslu skrifuðu undir áskorun til stjórnar Brunavarna Árnessýslu og Héraðsnefndar Árnessýslu þar sem skorað var á að umburðarlyndi verði sýnt í málinu. Nokkru síðar héldu Kristján og fagráð Brunavarna Árnessýslu sáttafundi sem samkvæmt heimildum Vísir voru vel heppnaðir.

Héraðsnefnd Árnesinga, stjórn Brunavarna Árnessýslu og Kristján hafa nú náð samningum um starfslok Kristjáns og mun Pétur Pétursson taka við sem slökkviliðsstjóri en hann var ráðinn úr hópi sjö umsækjenda. Hann starfaði áður sem aðstoðarslökkviliðsstjóri hjá Brunavörnum Árnessýslu.