Tvær búlgarskar konur þykja líklegastar til að taka við af Ban Ki-moon

Baráttan um hver taki næst við embætti framkvæmdastjóra Sameinuðu þjóðanna er hafin og eru tvær búlgarskar konur nú taldar líklegastar til að taka við kyndlinum úr hendi Suður-Kóreumannsins Ban Ki-moon.

Economist greinir frá því að þær Irina Bokova, framkvæmdastjóri Menningarmálastofnunar Sameinuðu þjóðanna (UNESCO), og Kristalina Georgieva, sem fer með fjárlagamál í framkvæmdastjórn Evrópusambandsins, leiði nú kapphlaupið um embættið.

Annað kjörtímabil Ban er á enda í ársbyrjun 2017 og verður nýr framkvæmdastjóri kjörinn í september.

Hart deilt um stuðning í Búlgaríu

Í grein Economist segir að hart sé deilt um það í Búlgaríu hvort ríkisstjórn landsins eigi að styðja Bokovu eða Georgievu. Segir að forsætisráðherrann Boyko Borisov sé náinn samstarfsmaður Georgievu en að hann vilji helst að hún vinni áfram að málum í Brussel.

Bokova er hins vegar með tengsl við stjórnarandstöðuna í Búlgaríu, en einn af smærri stjórnarflokkunum í landinu vill að Borisov lýsi yfir stuðningi við hana. Um miðjan mánuðinn hótaði flokkurinn að draga sig úr ríkisstjórn, verði Bokova ekki fyrir valinu.

Rússar styðja Bokovu

Bokova naut einu sinni stuðnings Bandaríkjastjórnar, en hefur sætt gagnrýni eftir að hún þrýsti á Bandaríkin að samþykkja aðild Palestínu að UNESCO árið 2011. Talið er að Rússar styðji þá hugmynd að Bokova taki við af Ban.

Vesna Pusic, fráfarandi utanríkisráðherra Króatíu, hefur lengi haft augastað á embættinu, en ólíklegt þykir að ný ríkisstjórn Króatíu komi til með að styðja við bakið á slíku framboði.

Aðrir frambjóðendur sem taldir eiga möguleika á embættinu eru Vuk Jeremic, fyrrverandi utanríkisráðherra Serbíu, og Miroslav Lajcak, utanríkisráðherra Slóvakíu.

Líklegast er talið að frambjóðandi frá Austur-Evrópu verði fyrir valinu að þessu sinni, enda „röðin“ komin að þeim ríkjahópi að eiga fulltrúa í stóli framkvæmdastjóri. Þó er ekki útilokað að fulltrúi annars staðar frá verði valinn, náist ekki samstaða um fulltrúa frá Austur-Evrópu.

Kjörinn til fimm ára

Framkvæmdastjóri Sameinuðu þjóðanna er skipaður af allsherjarþinginu samkvæmt tillögu öryggisráðsins. Er hann kjörinn til fimm ára í senn og hefur yfirumsjón með starfseminni.

Framkvæmdastjórinn getur ekki beitt neitunarvaldi gegn eða lagt fram bindandi ályktanir. Þó getur hann lagt fyrir öryggisráðið hvers kyns mál, sem hann telur að ógna kunni heimsfriðinum, auk þess að leggja fram tillögur um málefni, sem tekin skulu upp á allsherjarþinginu eða í öðrum stofnunum Sameinuðu þjóðanna.