Fjórtán ára drengur stakk skólabróður sinn til bana á Skáni

Fimmtán ára drengur var í gær stunginn til bana af fjórtán ára skólabróður sínum í grunnskóla í bænum Broby í norðurhluta Skánar í Svíþjóð.

Sérstök minningarathöfn verður í dag haldin í Göingeskólanum þar sem árásin átti sér stað.

Lögreglustjórinn Pär Cederholm segir að lögregla muni reyna að hraða rannsókninni á því hvað liggi að baki morðinu. Hann segir málið sérstaklega erfitt þar sem það veki sterkar tilfinningar fólks og sé mikill harmleikur. „Við munum þó ef til vill aldrei komast nákvæmlega að því hvað gerðist þar sem annar málsaðila er ekki lengur á lífi,“ segir Cederholm í samtali við SVT.

Drengurinn var stunginn um hádegisbil og var fluttur á sjúkrahús þar sem hann lést.

Aftonbladet greinir frá því að drengurinn sem grunaður er um verknaðinn hafi verið beittur einelti í skólanum um lengri tíma. Faðir hans segir að hann hafi þurft að fara með son sinn á sjúkrahús skömmu fyrir jólafríið þar sem hann hafi verið beittur ofbeldi og að myndbandsupptaka af atvikinu hafi verið dreift meðal nemenda skólans á Snapchat. „Ég hringdi í skólann og sagði frá því að honum liði illa, en þeir gerðu ekkert,“ segir faðir drengsins við Aftonbladet.

Robert Dirksen, skólastjóri Göingeskólans, segir að ákvörðun hafi verið tekin að loka ekki skólanum í dag vegna atburða gærdagsins. „Okkur þótti betra að vera með nemendurna í skólanum með vinum sínum og kennurum í stað þess að þeir væru einir heima.“

Lögregla segir að ekkert liggi enn fyrir um ástæður árásarinnar. Árásarmaðurinn var yfirheyrður í gær og verður aftur yfirheyrður síðar í dag.